Гадаадын хөрөнгө оруулалттай “Эм си ти ти” компанийн гадаад ажилтнууд Дорноговь аймгийн Айраг сумын нутаг дэвсгэрт байрлах “Баруун цагаан дэл уурхай”-д уулын ажлын тэсэлгээг ямар ч хяналтгүйгээр хийж буй ноцтой бичлэг манай редакцид ирлээ.

Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуульд заасны дагуу Монгол Улсын нутаг дэвсгэрт уулын ажлын тэсэлгээг тусгай зөвшөөрөлтэй аж ахуйн нэгжүүд, тагнуулын болон мэргэжлийн хяналтын байгууллагын хяналтан дор тусгай горим журмын дагуу гүйцэтгэх ёстой байдаг аж.

Гэтэл гадаадын хөрөнгө оруулалттай “Эм си ти ти” компанийн гурван гадаад ажилтан их хэмжээний тэсрэх бодисыг мэргэжлийн байгууллагын хяналтгүйгээр дур зоргоороо хийж буй нь гэмт хэрэг мөн гэдгийг эх сурвалж хэллээ. 

Энэхүү бичлэг дээр гарч буй гурван гадаадын иргэдийн нэг нь “Баруун цагаан дэл” уурхайн дарга Хуан Юн Цү гэгч юм.

Тэрбээр 2021 оны гуравдугаар сараас зургадугаар сарын хооронд өөрийнхөө удирдлага дор ажилладаг эмэгтэйд удаа дараа бэлгийн дарамт үзүүлсэн хэргээр 2021 оны долдугаар сард шүүхээс ял шийтгүүлсэн байдаг.

Тэрбээр өөрийнх нь зүй бус үйлдлийг цагдаа шүүхийн байгууллагад мэдэгдсэн эмэгтэйг Монголын талын захирал удирдлагуудтай үгсэн ажлаас нь халж, худалдан авах гэж байсан орон сууцнаас нь хөөж гаргахын зэрэгцээ их хэмжээний өр төлбөрт унагаж хохироосон асуудлыг илчилсэн нэвтрүүлгийг энд дарж үзээрэй.

---