Израилд Нетаньяху олонхын суудлаа алдаж, сонгуулийн дүнг эсэргүүцэв
Израилын парламентын ээлжит сонгуулиар Ерөнхий сайд Биньямин Нетаньяхугийн барууны эвсэл Кнессетэд олонхын суудлаа алдаж, ердөө 53 суудал авсан нь засгийн газар байгуулахад шаардлагатай 61 суудлын босгод хүрсэнгүй.
Үүний зэрэгцээ сөрөг хүчний болон Араб иргэдийн эрхийг төлөөлсөн намууд нийлээд 67 суудал авснаар Нетаньяхугийн засаглалыг огцруулах улс төрийн бодит нөхцөл бүрдлээ.
Нийт 120 суудалтай тус улсын парламентад Гади Айзенкот нарын тэргүүлсэн сөрөг хүчний эвсэл 48 суудал авсан байна. Түүнчлэн Мансур Аббасын тэргүүлдэг "Раам" болон Хамтарсан жагсаалт зэрэг Арабын намууд түүхэндээ хамгийн өндөр ирцтэй оролцож, нийт 19 суудал авчээ. Еврей сөрөг хүчний нам дангаараа олонх болж чадаагүй ч Арабын төлөөлөлтэй намуудтай зөвшилцөж чадвал шинэ засгийн газрыг байгуулах хангалттай саналтай болж байна.
Сонгуулийн албан ёсны дүн гарсны дараа Ерөнхий сайд Нетаньяху болон түүний Ликуд нам үр дүнг хүлээн зөвшөөрөхөөс татгалзаж, сонгуулийг "хулгайлсан" гэж мэдэгдэв. Тус намын зүгээс Арабын намуудыг сонгогчдод мөнгө тараасан, давхар санал өгүүлсэн болон хууль бус программ ашигласан хэмээн буруутгажээ.
Түүнчлэн Катар улсаас сонгогчдын ирцийг зохиомлоор өсгөх санхүүжилт хийсэн хэмээн хардаж, Үндэсний аюулгүй байдлын сайд Итамар Бен-Гвир болон парламентын дарга Амир Охана нар Арабын намын удирдагчдыг баривчлахыг шаардсан байна.
Харин Сонгуулийн төв хороо, Ерөнхий прокурор болон Шин Бет аюулгүй байдлын алба хамтран мэдэгдэл хийж, сонгуулийн үр дүнд нөлөөлөхүйц томоохон зөрчил илрээгүйг нотоллоо. Төв хорооны дарга Ноам Солберг Ерөнхийлөгчид өргөн барих албан ёсны дүнг хүчингүй болгох үндэслэлгүй гэдгийг зарласан бөгөөд шүүхээс баривчлагдсан хүмүүсийг нотлох баримт дутмаг гэж үзэн суллажээ. Катарын засгийн газар Ликуд намын мэдэгдлийг "утгагүй бөгөөд аюултай гүтгэлэг" гэж няцаасан бол "Раам" намын дарга Мансур Аббас үүнийг Арабын улс төрийн оролцоог боомилох гэсэн башир арга гэж тодорхойлов.
Сөрөг хүчний удирдагч Гади Айзенкот сонгуульд ялагдсан эрх баригчдыг ардчилсан үйл явцыг гутаахаа зогсоохыг шаардаж, Ерөнхийлөгч Исаак Герцог нийгмийн эв нэгдлийг хадгалахыг уриаллаа. Ажиглагчдын үзэж буйгаар Нетаньяхугийн энэхүү мэдэгдэл нь сөрөг хүчний намуудыг Арабын гишүүдтэй хамтрахад саад учруулж, парламентыг мухардалд оруулан дахин сонгууль зарлуулах улс төрийн зорилготой байна.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.