ХМТ-ны захирлыг заналхийлсэн Мичиган мужийн иргэнд хэрэг үүсгэв
АНУ-ын Мичиган мужийн Честерфилд хотхоны оршин суугч 42 настай Антони Даниэль Палаццоло гэгч заналхийлсэн утгатай мэдээлэл цахим орчинд болон утсаар дамжуулсан хэргээр холбооны шүүхэд яллагдагчаар татагдлаа. Түүнийг Холбооны мөрдөх товчооны захирал Каш Пател болон түүний ойрын хамтрагчдад амь нас, бэлгийн хүчирхийллийн заналхийлэл илгээсэн хэмээн буруутгаж байна. Сэжигтэн гэм буруутай нь тогтоогдвол холбооны шороонд тав хүртэлх жилийн хорих ял шийтгүүлэх эрсдэлтэй юм.
Хэрэг явдал 2026 оны аравдугаар сарын 8-ны өдөр эхэлсэн бөгөөд Палаццоло фэйсбүүк хуудсаар дамжуулан ХМТ-ны захирал Каш Пателын хамтран зүтгэгчид мессеж илгээсэн байна. Өөрийгөө «Baby Bird» гэж нэрлэсэн тэрээр уг зурвастаа тухайн албан тушаалтныг захиалгаар хөнөөх гэж байгаагаа дурдаад, захирал Каш Пателыг ч мөн хөнөөнө гэж заналхийлжээ. Мөрдөн байцаагчид нийгмийн сүлжээний хаягуудыг ашиглан түүний оршин суугаа газрыг тогтоож, дараа өдөр нь гэрт нь байцаалт авсан байна.
Гэрт нь хийсэн эхний байцаалтын үеэр Палаццоло Засгийн газар түүний өмчлөх эрхийг зөрчсөн гэж гомдоллож байсан ч мессеж илгээснээ хүлээн зөвшөөрч, бусдад хохирол учруулах бодол байгаагүй хэмээн хүлцэл өчжээ. Гэвч тусгай төлөөлөгч түүнд албан ёсоор харилцах утасны дугаар болон цахим хаяг үлдээсний дараа сэжигтний заналхийлэл улам даамжирсан байна.
Тэрээр аравдугаар сарын 12-ноос эхлэн ХМТ-ны төлөөлөгчөөс гадна Техас мужийн холбооны тойргийн шүүх, АНУ-ын Нууц алба болон Дээд шүүх рүү бэлгийн хүчирхийллийн заналхийлсэн цахим захидал илгээжээ. Түүнчлэн ХМТ-ны Детройт дахь салбар руу удаа дараа ярьж, холбооны албан тушаалтнуудыг зэвсэг хэрэглэн устгана гэж дуут шуудан үлдээсэн байна.
Холбооны мөрдөх товчоо аравдугаар сарын 30-ны өдөр Палаццолог баривчилж, Детройт хотын холбооны шүүхэд эхний мэдүүлгийг нь авч, цагдан хорьжээ. Өмнө нь Мичиган, Техас, Флорида мужуудад террорист заналхийлэл худал мэдээлсэн хэргээр шүүгдэж байсан түүнийг цаашид хорих эсэхийг шийдвэрлэх шүүх хуралдаан арваннэгдүгээр сарын 2-ны өдөр болохоор товлогдсон байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.