Цуврал алуурчин Тед Банди 1974 онд гарсан өсвөр насны охины аллагын хэрэгтэй ДНХ-ээр холбогджээ
АНУ-ын Юта мужийн хууль сахиулах байгууллагууд 1974 онд бусдын гарт онц хэрцгийгээр амиа алдсан 17 настай Мелисса Анн Смитийн хэргийг ДНХ-ийн дэвшилтэт шинжилгээний тусламжтайгаар илрүүлж, цуврал алуурчин Тед Банди үйлдсэнийг албан ёсоор зарлажээ.
Хагас зуун жил буюу 50 гаруй жилийн турш эзэн холбогдогч нь тодорхойгүй байсан уг хүйтэн хэргийн хохирогч Мелисса Смит 1974 оны аравдугаар сард сураггүй алга болсон түүхтэй. Улмаар мөн сарын 27-ны өдөр Солт Лэйк болон Саммит тойргийн зааг дахь ой модон дундаас анчин түүний цогцсыг олж байжээ. Мөрдөгчид тухайн үед задлан шинжилгээнээс авч хадгалсан эд мөрийн баримтаас Y-STR ДНХ-ийн профиль гарган авч чадсан бөгөөд уг дээж нь Тед Бандигийн ДНХ-тэй бүрэн тохирсон байна.
Энэхүү хэргийг тайлахад Юта мужид шийдэгдсэн өөр нэгэн аллага гол түлхэц болсон юм. Мөрдөгчид 1974 оны аравдугаар сарын 31-нд алга болж амиа алдсан 17 настай Лора Анн Эймийн цогцсоос олдсон биологийн шингэний ДНХ-г Тед Бандитай холбогдох боломжтойг тогтоогоод байв. Үүний дараа Лора Эйм болон Мелисса Смит нарын хэргээс илрүүлсэн генетикийн дээжүүдийг өөр хооронд нь харьцуулан шинжилснээр олон жил дарагдсан хэргийн үнэн мөнийг тогтоожээ. Юта мужийн шүүх эмнэлгийн лаборатори он удаан жил хадгалагдсан, муудаж гэмтсэн эсвэл нэн бага хэмжээтэй дээжээс ч генетикийн мэдээлэл гаргаж авах чадвартай шинэ дэвшилтэт технологи нэвтрүүлсэн нь хэргийг илрүүлэхэд шийдвэрлэх үүрэг гүйцэтгэсэн байна.
Саммит тойргийн прокурор Маргарет Олсон ДНХ-ийн шинжилгээний үр дүнгээс гадна гэмт хэрэг үйлдэгдсэн хэв шинж, сэдэл, цаг хугацааны хүчин зүйл зэрэг бүх нөхцөл Тед Банди энэ аллагыг үйлдсэнийг бүрэн нотолж буйг онцоллоо. Мөн Солт Лэйк тойргийн шериф Рози Ривера эд мөрийн баримтыг анхнаас нь алдагдалгүй хадгалж хамгаалахын ач холбогдлыг дурдсан бол Юта тойргийн цагдаагийн дэслэгч Майк Рейнольдс хохирогчдын дуу хоолой тэдний амийг хороосон алуурчны үзэн ядалтаас хавьгүй хүчтэй цуурайтах ёстойг тэмдэглэсэн байна.
Тед Банди нь 1970-аад онд АНУ-ын хэд хэдэн мужид 30 гаруй охид, эмэгтэйчүүдийн амийг хөнөөсөн цуврал алуурчин бөгөөд 1989 онд цахилгаан сандалд суулган цаазалсан билээ. Мөрдөн шалгах багийнхан өдгөө тухайн цаг үед сураггүй алга болж амиа алдсан гэж үздэг 16 настай Нэнси Вилкоксын хэргийг үргэлжлүүлэн шалгаж, үнэнийг тогтоохоор ажиллаж байна.
Эх сурвалж:
• vertexaisearch.cloud.google.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.