АНУ-ын Флорида мужид хувийн тийрэлтэт онгоц сүйрч есөн хүн амиа алджээ
АНУ-ын Флорида мужид хувийн тийрэлтэт онгоц осолдож, хөлгийн бүхээгт зорчиж явсан есөн иргэн амь насаа алджээ. Техас мужийн Остин хотоос Багамын арлуудыг чиглэн нисэж байсан уг бизнес ангиллын агаарын хөлөг ням гаргийн өдрийн 12:50 цагийн орчимд ширүүн шуургатай цаг агаарын хүнд нөхцөлд осолджээ.
Осолдсон хөлөг нь Канадын “Bombardier” компанийн үйлдвэрлэсэн, хоёр хөдөлгүүрт “Learjet 60” загварын бизнес ангиллын тийрэлтэт онгоц байсан бөгөөд Делавэр мужид бүртгэлтэй компани эзэмшдэг байжээ. “Austin-Bergstrom” олон улсын нисэх буудлаас хөөрсөн уг хөлөг Багамын “North Eleuthera” чиглэлд замдаа гарсан ч Флоридагийн Крестхейвен, Гринэйкрс болон Лейк Уорт Бич суурингуудын ойролцоо замын хажууд сүйрсэн юм. Осол болох үед тухайн бүс нутагт ширүүн бороо орж, аянга цахилгаантай хүчтэй шуурга дэгдэж байжээ.
Агаарын тээврийн хөдөлгөөнийг удирдах албаны дууны бичлэгээс үзвэл, нисэгч ослоос өмнөхөн орчны агаарын хэм хасах 47 хэм хүрч хүйтэрсэн, дунд зэргийн савалгаатай, онгоцны далавчинд мөс тогтож байгааг мэдэгдэн өндрөө 37,000 фут хүртэл нэмэх хүсэлт тавьсан байв. Гэвч удалгүй онгоц хяналтаас гарч, минутад 20,000-аас 32,000 футын өндөр хурдтайгаар огцом доошилж эхэлжээ. Нисэгч эцсийн мөчид радио холбоогоор “Бид хэт өндөр хурдтайгаар минутад 20,000 фут унаж байна... Газар мөргөх гэж байна... Бидэнд цаг үлдсэнгүй” хэмээн ослын аюулын дохио өгсөн байна.
Онгоц Милитари Трейл авто замын хажууд босоо шахуу чиглэлтэй сүйрэн унаснаар хүчтэй дэлбэрэлт үүсгэн шатаж, газарт томоохон хэмжээний нүх тогоо үүсгэжээ. Флорида мужийн амбан захирагч Рон ДеСантис газар дээр байсан оршин суугчдаас бэртэж гэмтсэн хүн байхгүй болохыг албан ёсоор мэдээлсэн бөгөөд аюулгүй байдлыг хангах үүднээс ойролцоох хөдөлгөөнт сууцны паркийн 600 орчим иргэнийг түр нүүлгэн шилжүүлж, авто замын хөдөлгөөнийг хаасан байна.
АНУ-ын Тээврийн сайд Шон Даффи болсон явдлыг аймшигт эмгэнэлт явдал гэж тодорхойлжээ. Одоогоор АНУ-ын Иргэний агаарын тээврийн газар болон Үндэсний тээврийн аюулгүй байдлын зөвлөл хамтран ослын шалтгаан, нөхцөл байдлыг нарийвчлан тогтоохоор тусгай мөрдөн шалгах баг гарган ажиллаж байна.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.