Амьтны хүрээлэнгийн ажилтан ирвэсийн дайралтад өртөн амиа алджээ
Нидерландын өмнөд хэсэгт орших Хилваренбек хотын “Safaripark Beekse Bergen” амьтны хүрээлэнд 50 гаруй насны туршлагатай эмэгтэй ажилтан хоёр эр перс ирвэст халдуулж, авсан хүнд шархныхаа улмаас нас барсан харамсалтай явдал гарчээ.
Тус паркад 17 настайгаасаа эхлэн 40 шахам жил, тэр дундаа ирвэс асрагчаар найман жил тасралтгүй ажилласан тэрбээр халдлагад өртөж эмнэлэгт хүргэгдсэн ч шархаа даалгүй амьсгал хураасан болохыг амьтны хүрээлэнгийн удирдлагууд албан ёсоор мэдээлэв.
Осол аравдугаар сарын 24-ний бямба гаргийн өглөөний 11:00 цагийн орчимд болжээ.
Цаг агаарын шуургатай нөхцөл байдлын улмаас хоёр ирвэсийг дотор байранд оруулсан байсан бөгөөд ажилтан эмэгтэй тус байранд ганцаараа ажиллаж байх үедээ халдлагад өртсөн байна. Хүнд бэртсэн ч тэрбээр богино долгионы станцаараа дамжуулан хамт олондоо яаралтай дохио өгч чадсан тул түргэн тусламжийн нисдэг тэрэг болон эмч нарын баг богино хугацаанд ирж, түүнийг эмнэлэгт хүргэжээ.
Толгой болон хүзүүндээ хүнд хэлбэрийн шарх авсан ажилтанд яаралтай мэс засал хийсэн боловч биеийн байдал нь эрс муудсаар байж. Улмаар аравдугаар сарын 27-ны мягмар гаргийн өдөр бэртлээ даалгүй таалал төгссөн болохыг тус байгууллага зарлаж, олон жил үнэнчээр зүтгэсэн хамтрагчаа алдсандаа гүн эмгэнэл илэрхийлжээ.
Нидерландын хувийн нууцын тухай хуулийн дагуу талийгаачийн нэрийг нийтэд зарлаагүй бөгөөд паркийн нутаг дэвсгэрт эмгэнэл илэрхийлэх тусгай талбай гаргасан байна.
Аюулгүй байдлын үндсэн журмын дагуу махчин том муурын төрлийн амьтадтай нэг байгууламжид хамт байхыг хатуу хориглодог дүрэмтэй аж. Гэвч ажилтан ямар шалтгаанаар ирвэсүүд байсан хашаанд орсон нь одоогоор тодорхойгүй байгаа бөгөөд уг байранд хяналтын камер байхгүй байгаа нь ослын нарийн шалтгааныг тодруулахад хүндрэл учруулж байна. Одоогийн байдлаар Нидерландын Хөдөлмөрийн хяналтын алба ажлын байрны аюулгүй ажиллагааны горим мөрдөгдсөн эсэхэд хөндлөнгийн шалгалт эхлүүлээд байна.
Уг хэргийн дараа тус амьтны хүрээлэнгийн зүгээс халдлага үйлдсэн хоёр ирвэсийг унтуулахгүй буюу устгахгүй гэдгээ мэдэгдлээ. Амьтны хүрээлэнгийн төлөөлөгч тэдгээр амьтад төрөлх махчин зөнгөө л харуулсан гэдгийг тодотгоод, махчин амьтад төрөлх чанараараа л үлдэнэ хэмээн тайлбарласан байна. Энэхүү явдал нь зэрлэг амьтан асрах үйл ажиллагааны стандартыг чанд сахих болон хяналтын тогтолцоог сайжруулах шаардлагатайг сануулсан явдал боллоо.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.