Туркийн таван одтой зочид буудлын шүршүүрийн шилэн хаалга орос жуулчин дээр унажээ

Туркийн таван одтой "Well Palace Side" зочид буудалд есдүгээр сарын 3-ны өдөр Оросын жуулчин эмэгтэй шүршүүрийн шилэн хаалганд дарагдаж, хүнд бэртсэн ноцтой хэрэг гарчээ.

Төрсөн өдрөө гэр бүлийнхэнтэйгээ тэмдэглэж байсан жуулчин эмэгтэй шүршүүрт орох үед бэхэлгээ муутай шилэн хаалга мултран унаж, бие дээр нь хагарсан байна. Уг ослын улмаас хохирогчийн гар, хөл гүн зүсэгдэж, эмнэлгийн яаралтай тусламж авсан байна.

Хохирогч эмэгтэй зургаан настай хүүхдээ усанд оруулсны дараа өөрөө шүршүүрт орсон бөгөөд хэдхэн минутын дараа уг осол болжээ. Шүршүүрийн шилэн хаалганы өнхрөх бэхэлгээ муу байснаас мултран унаж, олон хэсэг болон бутарсан байна. Эмэгтэйн нөхөр яаралтай тусламж дуудаж, зочид буудалд анхан шатны тусламж үзүүлсний дараа орон нутгийн эмнэлэг рүү хүргэжээ. Эмнэлгийн эмч нар түүний гарны гүн зүсэгдсэн шархыг оёж, бусад шархыг цэвэрлэн, рентген зураг авч, тариа хийсэн байна.

Осол гарсны дараа зочид буудлын захиргаанаас гаргасан шийдвэр жуулчдын бухимдлыг төрүүлжээ. Эмнэлгээс буцаж ирсэн гэр бүлийг долоо хоногийн 87 мянган рублийн үнэтэй, урьдчилан төлсөн дээд зэрэглэлийн өрөөнөөс нь гаргаж, энгийн стандарт өрөө рүү шилжүүлжээ. Түүнчлэн эрүүл мэнд, сэтгэл санааны хохирол болон өрөөний зэрэглэл буурсанд мөнгөн нөхөн төлбөр олгохын оронд зочид буудлын зүгээс тэдэнд шарсан талх, шүүс, шарсан төмс өгсөнд тэд маш их гомдолтой байгаа аж.

Эх сурвалж:

• life.ru

• lenta.news

• life.ru

• radio1.ru

• rosbalt.ru