Манчестер Сити клуб Энцо Фернандесыг түүхэнд байгаагүй үнээр багтаа авлаа
Английн хөлбөмбөгийн Манчестер Сити клуб солилцоо наймааны цонх хаагдах сүүлчийн өдөр буюу 2026 оны есдүгээр сарын 1-нд Челси клубийн хагас хамгаалагч Энцо Фернандесыг 125 сая фунт стерлингээр албан ёсоор элсүүллээ.
Британийн хөлбөмбөгийн түүхэн дэх хамгийн өндөр солилцооны дүнд тооцогдох эл наймааны үр дүнд Аргентины шигшээ багийн 25 настай тоглогч Этихад цэнгэлдэх хүрээлэнд 2031 оны зун хүртэл таван жилийн хугацаатай тоглохоор гэрээлсэн байна. Ингэснээр тэрбээр Премьер лигийн түүхэнд хоёр удаа 100 сая гаруй фунтээр зарагдсан анхны тоглогч болж түүхэнд бичигдлээ.
Хоёр клубийн хооронд өрнөсөн хэлэлцээр нэлээд сунжирсны эцэст талууд харилцан буулт хийж, тохиролцоонд хүрчээ.
Манчестер Сити клуб эхэндээ 104 сая фунт дээр нэмэлт урамшуулал санал болгосон бол Челси клуб 135 сая фунтыг бэлнээр шаардаж байв. Хэрэв тохиролцохгүй бол Сити хэлэлцээрийг цуцална гэж мэдэгдсэний дараа талууд 125 сая фунт дээр нэгдсэн байна. Энцо Фернандес гурван сарын өмнөөс Челсиг орхих хүсэлтэй байгаагаа илэрхийлж, өмнө нь хамтран ажиллаж байсан дасгалжуулагч Энцо Марескатай эргэн нэгдэхийг зорьжээ. Челсигийн дасгалжуулагч Хаби Алонсо түүнийг сүүлийн тоглолтуудын бүрэлдэхүүнээс хасаж, зөвхөн "багийн төлөө тоглох чин хүсэлтэй тоглогчдыг талбайд гаргана" хэмээн мэдэгдэж байсан юм. Челси түүний оронд Монакогийн хагас хамгаалагч Ламин Камараг 47 сая фунтээр авахаар төлөвлөж байсан ч Монако сүүлчийн мөчид татгалзсанаар орлох тоглогчгүй хоцорсон хэдий ч Фернандесыг зарахаар шийджээ.
Уг шилжилт нь Энцо Фернандесыг Манчестер Ситигийн дасгалжуулагч Энцо Марескатай дахин "уулзуулж" байна. Тэд өмнө нь Челси клубт хамтдаа Клубүүдийн дэлхийн аварга шалгаруулах тэмцээнд түрүүлж байсан түүхтэй.
Шинэ багтаа нэгдсэнийхээ дараа Фернандес өгсөн ярилцлагадаа Манчестер Ситиг сүүлийн үеийн Английн хамгийн амжилттай клуб хэмээн тодорхойлж, цом авах зорилгын төлөө зүтгэхэд бэлэн байгаагаа илэрхийлсэн юм. Мөн тэрбээр Инстаграм хуудсаараа дамжуулан Челсигийн хөгжөөн дэмжигчдэд хандан сүүлчийн өдрүүдэд үүссэн хүнд нөхцөл байдлыг ойлгохыг хүссэн байна. Ситигийн хөлбөмбөгийн захирал Уго Виана шинэ тоглогчоо техникийн өндөр ур чадвартай, хөдөлмөрч, дайчин бөгөөд гоол оруулах чадвартай төгс хагас хамгаалагч хэмээн сайшаажээ.
Фернандесын ийн бууриа сэлгэсэн нь Манчестер Ситигийн энэ зуны томоохон шинэчлэлийн нэг хэсэг юм. Тус клубээс Родри, Бернардо Силва, Нико Гонзалес, Тижани Рейндерс зэрэг гол тоглогчид явсны дараа ийнхүү бүрэлдэхүүнээ хүчирхэгжүүлж байна. Сити энэ зун Эллиот Андерсоныг 116 сая фунтээр, Аюб Буаддиг 85 сая фунтээр тус тус авсан бөгөөд солилцооны цонх хаагдах өдөр Эвертоны жигүүрийн тоглогч Илиман Ндиаг 65 сая фунтээр багтаа нэгтгэжээ.
Ингэснээр Манчестер Сити клуб энэ зуны солилцооны цонхоор нийт 435-458 сая фунт стерлинг зарцуулж, Премьер лигийн дээд амжилтыг тогтоосон бөгөөд үүнийхээ 300 сая орчим фунтыг тоглогчдоо зарж нөхсөн байна.
Энцо Фернандесыг ийнхүү түүхэн дээд үнээр авсан нь Манчестер Сити клуб дотоодын болон Европын тавцанд ноёрхлоо хадгалах амбицаа тодорхой харуулсан хэрэг боллоо. Шинэчлэгдсэн дунд шугам болон шинэ дасгалжуулагчийн тактик хэрхэн зохицохыг хөлбөмбөгийн хорхойтнууд анхааралтай ажиглаж байна. Ирэх улирлуудад Фернандес багийнхаа гол хөдөлгүүр болж, олон цом хүртэхэд шийдвэрлэх үүрэг гүйцэтгэнэ гэсэн хүлээлт үүсээд байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.