Илон Маск Америкийн хүүхэд бүрд SpaceX-ийн хувьцаа бэлэглэнэ
Тэрбумтан Илон Маск ирэх 2027 онд АНУ-ын 18 хүртэлх насны бүх хүүхдэд өөрийн эзэмшлийн "SpaceX" компанийн нэг ширхэг хувьцааг бэлэглэхээр төлөвлөж буйгаа зарлалаа. Тэрбээр даваа гаргийн мэдэгдэлдээ энэхүү алхам нь цаашид үргэлжлэх олон ажлын эхлэл болно хэмээн тэмдэглэсэн байна.
АНУ-ын хүн амын тооллогын товчооны мэдээллээр тус улсад 18 хүртэлх насны 72–73 сая орчим хүүхэд бүртгэлтэй байдаг. "SpaceX" компани 2026 оны зун олон нийтэд нээлттэй хувьцаат компани болж, зах зээлийн нийт үнэлгээ нь хоёр их наяд ам.долларт хүрсэн юм. Баасан гаргийн арилжаа хаагдахад нэгж хувьцааны ханш 146.03 ам.доллар байсан бөгөөд амлалтын нийт өртөг одоогийн үнэлгээгээр 10.5–10.7 тэрбум ам.доллароор хэмжигдэж байна. Түүнчлэн энэ нь шинээр хувьцаа гаргах бус, бизнес эрхлэгчийн хувийн багцаас шилжих тул түүний эзэмшлийн 1.5 орчим хувийг бүрдүүлнэ.
Уг шийдвэр гарахад хиймэл оюуны "Anthropic" компанитай холбоотой маргаан нөлөөлжээ. "Anthropic" өөрийн хувьцааны таван хувийг олон нийтийн санд хуваарилахаа зарласны дараа Маск дээрх шийдвэрийг шүүмжилж, хувьцааг санд бус иргэдэд шууд өгөх нь зүйтэй хэмээн үзсэн юм. Мөн тус улсын засаг захиргаанаас эхлүүлсэн "Trump Accounts" хөрөнгө оруулалтын хөтөлбөр нь хүүхдүүдэд татваргүй хувьцаа хандивлах нөхцөлийг олгож буй бөгөөд үүнээс өмнө компанийн Ерөнхийлөгч Гвинн Шотвелл хоёр сая хүүхдэд хувьцаа өгөхөө мэдэгдээд байв.
Гэвч 2027 онд хувьцааг ямар зохицуулалтаар, аль шалгуураар, ямар дансаар дамжуулан хүүхдүүдэд тараах нарийвчилсан төлөвлөгөө одоогоор тодорхойгүй байна. Уламжлалт буяны сангаар дамжих бус, хойч үедээ шууд корпорацын өмчлөл, хөрөнгийн зах зээлийн оролцоо олгох энэхүү шинэлэг санаачилга бодит байдал дээр хэрхэн хэрэгжих нь шинжээчдийн анхаарлыг ихээхэн татаж байна.
Эх сурвалж:
• qz.com
• ub.life
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.