Австралийн хэрэглэгчдийн итгэл үнэмшлийн индекс наймдугаар сард 6.0 хувиар өсжээ
Австралийн хэрэглэгчдийн итгэл үнэмшлийн индекс наймдугаар сард огцом өсөж, сүүлийн есөн сарын хугацаанд хамгийн дээд түвшиндээ хүрчээ.
'Westpac' банк болон Мельбурны хүрээлэнгээс хамтран гаргадаг судалгааны дүнгээс үзвэл, тус улсын Төв банк бодлогын хүүгээ хэвээр үлдээх шийдвэр гаргасан нь иргэдийн эдийн засагт итгэх итгэлийг сэргээхэд гол түлхэц болсон байна.
Судалгааны тайланд дурдсанаар, хэрэглэгчдийн итгэл үнэмшлийн индекс наймдугаар сард 6.0 хувиар өсөж, 88.9 нэгжид хүрсэн нь өмнөх оны арваннэгдүгээр сараас хойших хамгийн хурдан өсөлт болжээ.
Бодлогын хүүг хэвээр үлдээсэн шийдвэр нь орон сууцны зээлтэй иргэд болон түрээслэгчдэд харилцан адилгүй нөлөөлсөн байна. Тодруулбал, ипотекийн зээлтэй өрхүүдийн итгэл үнэмшил наймдугаар сард 16 хувиар өссөн нь зээлийн хүүгийн дарамт ойрын хугацаанд нэмэгдэхгүй гэсэн хүлээлттэй холбоотой юм. Эсрэгээрээ, орон сууц түрээслэгчдийн итгэл үнэмшил тухайн сард 2.3 хувиар буурсан үзүүлэлттэй гарчээ.
Хэрэглэгчдийн худалдан авах чадвар болон үл хөдлөх хөрөнгийн зах зээлийн үзүүлэлтүүд мөн эерэг өөрчлөлт үзүүлжээ. Гэр ахуйн томоохон бараа бүтээгдэхүүн худалдан авах цаг хугацааг үнэлэх индекс 8.1 хувиар өсөж 93.8 нэгжид хүрсэн бол орон сууц худалдан авахад тохиромжтой цаг үеийг илэрхийлэх индекс 12.1 хувиар өсөж 95.7 нэгж болсон нь сүүлийн есөн сарын хамгийн өндөр үзүүлэлт юм. Гэвч хөдөлмөрийн зах зээл дэх тодорхойгүй байдал нэмэгдэж, ажилгүйдлийн хүлээлтийн индекс 4.4 хувиар өсөж 135.7 нэгжид хүрсэн нь иргэд ирээдүйд ажилгүйдэл нэмэгдэнэ гэж үзэж байгааг харуулж байна.
Эх сурвалж:
• kelo.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.