Нисэх буудалд танилцсан хосууд 27 жилийн дараа эргэн холбогдсон онцгой түүх
АНУ-ын Солт Лэйк Сити хотын нисэх буудалд анх танилцаж байсан Николь Камиан, Эрик Рэйсли нар салснаасаа хойш 27 жилийн дараа утсаар ярьж, эргэн холбогдсон гайхалтай түүхийг "Си-Эн-Эн" агентлаг онцолжээ.
Тэд анх 1995 оны зургаадугаар сарын 28-ны өдөр Аляскийн Анкориж руу чиглэсэн нислэгийн дараалалд зогсож байхдаа танилцаж байсан бөгөөд олон жилийн дараа ийнхүү бие биенийгээ олсон байна.
Анхны уулзалтын үеэр Николь Аляск руу явган аялал хийхээр явж байсан бол Эрик загас агнуурын үйлдвэрт ажиллахаар хойд зүгийг зорьж байжээ. Эрик түүнийг жинсэн өмдөн дотуураа дулаан өмд өмссөн, тод инээмсэглэлтэй, өхөөрдөм хиппи төрхтэй байсныг тод санадаг тухайгаа хуваалцсан юм. Санамсаргүй уулзалтаас эхэлсэн тэдний харилцаа хол зайн хайр дурлал болон үргэлжилсэн байна.
Гэвч хол зайн харилцааны бэрхшээлээс шалтгаалан тэд 1997 онд салж, өөр өөрийн замаар замнажээ. Николь өнгөрсөн хугацаанд гэрлэж, хүүхдүүдтэй болсон ч 2017 онд гэр бүлээ цуцлуулсан байна. Тэрбээр салсныхаа дараа ч Эриктэй хамт авахуулсан зургийн аппаратны хальс, захидал, нисэх буудалд гэнэт уулзаж байсан дурсамжаа тэмдэглэсэн өдрийн тэмдэглэл зэргийг хадгалсаар байжээ.
Гэр бүлээ цуцлуулсны дараа Николь, Эрикийг цахим орчноос хайж эхэлсэн байна. Түүний ховор овгийн тусламжтайгаар Эрикийг Аляскад багшаар ажиллаж байгааг олж мэджээ. Түүнд цахим шуудангийн хаяг байгаагүй тул Николь түүний гэрийн хаягаар ердөө гурван өгүүлбэр бүхий богино захидал илгээж, холбоо барих дугаараа үлдээсэн ч эхэндээ ямар нэгэн хариу хүлээж аваагүй тул тэгсгээд орхисон аж.
Гэтэл тэдний анхны уулзалтаас хойш 27 жилийн дараа буюу 2022 онд Николийг Өмнөд Африкт ажлын шугамаар явж байх үед түүний утсанд Аляскаас дуудлага иржээ. Николийг утсаа авахад цаанаас нь "Би Эрик байна" хэмээх танил хоолой гарсан байна. Уг гэнэтийн дуудлага олон жилийн турш тасарсан байсан тэдний холбоог дахин сэргээж, хуучин амрагуудыг эргэн нэгтгэсэн байна.
Хэдийгээр олон жил өнгөрч, амьдралын олон нугачааг туулсан ч тэдний залуу насны нандин дурсамж, бие биенийгээ гэсэн сэтгэл хэвээр үлдсэнийг энэ түүх харуулж байна. Олон жилийн дараах гэнэтийн учрал нь тэдний амьдралд шинэ хуудсыг нээж, ирээдүйд хамтдаа шинэ дурсамжуудыг бүтээх боломжийг олгож байгаа юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.