Эрхүүд тарваган тахал дэгдсэн гэх цуурхлыг албаныхан няцаалаа
ОХУ-ын Эрхүү мужийн Тахал судлалын эрдэм шинжилгээний хүрээлэнгийн 28 настай ажилтан Дарья Шипилова гэнэт нас барсантай холбоотойгоор Сибирьт тарваган тахал дэгдсэн гэх мэдээ тархаж, орон нутгийн иргэдийг сандаргасан үйл явдал болжээ.
Хэрэглэгчдийн эрх ашгийг хамгаалах, хяналтын "Роспотребнадзор" албанаас хийсэн нарийвчилсан шинжилгээгээр талийгаач тарваган тахлын халдвар аваагүй бөгөөд тодорхойгүй шалтгаант уушгины хатгалгааны улмаас нас барсан болохыг албан ёсоор тогтоожээ.
Талийгаач Дарья Шипилова нь Эрхүүгийн Тахал судлалын эрдэм шинжилгээний хүрээлэнд лаборантаар ажилладаг байсан бөгөөд тарваган тахлын нянгийн антибиотикт тэсвэртэй байдлыг судлах чиглэлээр мэргэшсэн байжээ. Тэрбээр есдүгээр сарын 25-ны өдөр лабораторидоо ажиллаж байгаад, хоёр хоногийн дараа бие нь чилээрхэж эхэлсэн байна. Улмаар есдүгээр сарын 29-нд уушгины хүнд хэлбэрийн үрэвсэл гэсэн оноштойгоор Шелехов хотын эмнэлэгт хүргэгдэн, хиймэл амьсгалын аппаратад орсон боловч аравдугаар сарын 2-ны шилжих шөнө амьсгал хураажээ.
Залуу мэргэжилтэн гэнэт таалал төгссөн нь олон нийтийн сүлжээ болон хэвлэл мэдээллийн хэрэгслээр "лабораторийн шилэн сав хагарч, уушгины тахлын халдвар алдагдсан" гэх цуурхал дэгдэхэд хүргэсэн юм. Мөн түүнийг хөрш зэргэлдээ ОХУ-ын Буриад автономит улс, эсвэл Тайланд руу аялж явахдаа халдвар авсан байж болзошгүй гэх таамаг гарч байв. Үүний улмаас Шелехов болон Эрхүү хотын оршин суугчид эмийн сангуудаас антибиотик ихээр худалдан авч, зарим цэцэрлэгт амны хаалт тарааж эхэлсэн нь орон нутагт багагүй сандрал үүсгэжээ.
Халдварт өвчин тархахаас сэргийлэх үүднээс эрх баригчид яаралтай тусгаарлах арга хэмжээ авсан байна. Талийгаачтай харилцаатай байсан эмнэлгийн ажилтнууд, түргэн тусламжийн баг, хүрээлэнгийн хамт олон зэрэг нийт 200 орчим хүнийг эмнэлгийн хяналтад оруулжээ. Үүнээс гадна Шелеховын төв эмнэлэг болон Эрхүү хотын хэд хэдэн төрөх эмнэлэг, хүүхдийн эмнэлгүүдэд 21 хоногийн хөл хорио тогтоож, олон нийтийг хамарсан арга хэмжээнүүдийг түр хугацаагаар цуцалсан байна.
"Роспотребнадзор" байгууллагын дарга Анна Поповагийн тушаалаар Эрхүүгийн Тахал судлалын хүрээлэнд хийсэн шалгалтаар аюулгүй байдлын дүрэм журам зөрчигдөөгүй, ямар нэгэн шилэн сав хагараагүй болохыг тогтоов. Лабораторийн нарийвчилсан шинжилгээгээр талийгаачийн биесээс тарваган тахлын үүсгэгч илрээгүй бөгөөд тусгаарлагдсан 200 орчим иргэний шинжилгээний хариу бүгд сөрөг гарчээ. Албаныхан Эрхүү муж болон Шелехов хотын ариун цэвэр, тархвар судлалын нөхцөл байдал бүрэн тогтвортой байгааг зарлаж, эрүүгийн хэрэг үүсгэн шалгалтын ажиллагааг үргэлжлүүлж байна.
Эх сурвалж:
• vc.ru
• bfm.ru
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.