Дональд Трамп америкчуудыг шатахууны үнийн өсөлттэй эвлэрэхийг уриалав
АНУ-ын Ерөнхийлөгч Дональд Трамп Нью-Йорк мужийн Гарден Ситид болсон улс төрийн цуглааны үеэр үг хэлэхдээ, Иран улсыг цөмийн зэвсэгтэй болохоос урьдчилан сэргийлэхийн тулд америкчуудыг шатахууны үнийн өсөлттэй эвлэрэхийг уриаллаа. Тэрээр дэмжигчиддээ хандан Ираны эсрэг тэмцэлд бензин тосондоо бага зэрэг илүү мөнгө төлөх нь зүйтэй хэмээн мэдэгдсэн байна. Түүнчлэн Трамп Ираныг ялж дууссаны дараа стратегийн чухал ач холбогдолтой Ормузын хоолойг АНУ-ын газар нутаг гэж зарлахаа амласан нь мөргөлдөөний хурцадмал байдлыг улам нэмэгдүүлэв.
АНУ-ын Автомашины холбооноос мэдээлснээр, 2026 оны наймдугаар сарын 14-ний баасан гаргийн байдлаар тус улсад нэг галлон бензиний дундаж үнэ 4.08 ам.долларт хүрчээ. Энэ нь өмнөх оны мөн үеийнхээс буюу 3.16 ам.доллар байснаас даруй 29 хувиар өссөн үзүүлэлт юм. Үүний зэрэгцээ дэлхийн зах зээл дээр Брент маркийн газрын тосны үнэ баррель нь 90 ам.долларт дөхөж, хэрэглэгчдийн санхүүд хүндээр тусаж эхэлсэн байна.
Эрчим хүчний үнэ ийнхүү огцом өсөх болсон гол шалтгаан нь АНУ болон Израилийн зүгээс 2026 оны хоёрдугаар сарын 28-нд эхлүүлсэн дайны уршиг юм. Уг зэвсэгт мөргөлдөөний улмаас дэлхийн газрын тосны нийт тээвэрлэлтийн тавны нэг буюу 20 хувь нь дамжин өнгөрдөг Ормузын хоолойн тээвэрлэлт бүрэн зогсоод байна. Стратегийн гол зангилаа болсон усан замыг хаасан нь дэлхийн хэмжээнд эрчим хүчний хямрал нүүрлэх нөхцөлийг бүрдүүлжээ.
Трампын мэдэгдлийн хариуд Иран улс хатуу байр суурь илэрхийллээ. Ираны Гадаад хэргийн дэд сайд Казем Гарибабади наймдугаар сарын 15-ны бямба гаргийн өглөө өөрийн Х хуудсаараа дамжуулан АНУ-ыг ялагдлаа хүлээн зөвшөөрөхийг уриалсан байна. Тэрээр Ормузын хоолойг зөвхөн Ираны тушаалаар нээж, хаана гэдгийг онцлоод, АНУ хоосон төсөөллөө зогсоож, бодит байдалтай эвлэрэх хүртэл Иран улс хориг арга хэмжээгээ үргэлжлүүлнэ хэмээн мэдэгджээ.
Шатахууны үнийн өсөлт болон инфляцын дарамт нь АНУ-ын сонгогчдын дунд сэтгэл дундуур байдлыг үүсгэж, Трампын хувьд улс төрийн томоохон эрсдэл дагуулж эхлэв. Өмнө нь эрчим хүчний зардлыг бууруулна гэж амлаж байсан түүний хувьд энэхүү нөхцөл байдал нь ирэх арваннэгдүгээр сард болох конгрессын завсрын сонгуулийн өмнө хүнд цохилт болж байна. Ардчилсан намынхан энэхүү эдийн засгийн хүндрэлийг сонгуулийн кампанит ажлынхаа гол сэдэв болгон ашиглахаар бэлтгэж байгаа тул цаашид АНУ-ын дотоод улс төрийн тэмцэл улам ширүүсэх төлөвтэй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.