АНУ Ираны эсрэг тэнгисийн бүслэлтийг хугацаагүй үргэлжлүүлнэ

АНУ, Ираны хоорондын цэргийн болон эдийн засгийн сөргөлдөөн улам хурцдаж байна. АНУ Ираны эсрэг тогтоосон тэнгисийн бүслэлтийг хугацаагүй үргэлжлүүлэх боломжтой гэдгээ мэдэгдсэн бол Иран хариу арга хэмжээ авахаа анхааруулжээ.

АНУ-ын Батлан хамгаалахын сайд Пит Хегсет наймдугаар сарын 13-нд мэдэгдэхдээ, Тэнгисийн цэргийн хүчний хөлөг онгоцуудыг ээлжлэн байршуулснаар бүслэлтийг удаан хугацаанд үргэлжлүүлэх боломжтой гэжээ. Мөн АНУ-ын Сангийн сайд Скотт Бессент Ираны эсрэг урьд өмнө байгаагүй хэмжээний шинэ хориг арга хэмжээ авахаар бэлтгэж байгааг мэдэгдсэн байна.

Харин Ираны тал эдийн засгийн хоригийг цуцалж, царцаасан хөрөнгийг чөлөөлөх хүртэл Ормузын хоолойг олон улсын тээвэрт бүрэн нээхгүй гэсэн байр сууриа илэрхийлжээ. Тус хоолойгоор хэвийн үед дэлхийн газрын тос, LNG-ийн худалдааны ойролцоогоор 20 хувь дамждаг бөгөөд мөргөлдөөний улмаас тээвэрлэлт эрс буурсан байна.

Үүний зэрэгцээ АНУ бүс нутаг дахь цэргийн хүчээ нэмэгдүүлж, Task Force Falcon Strike нэртэй шинэ дроны нэгж байгуулжээ. Мөн USS Abraham Lincoln нисэх онгоц тээгчийг USS George Washington хөлгөөр сэлгэхээр бэлтгэж байна. Ийнхүү АНУ хориг, бүслэлтээ чангатгаж, Иран Ормузын хоолойг хөшүүрэг болгон ашиглаж буй энэ үед мөргөлдөөн цаашид хэлэлцээрээр намжих уу, эсвэл бүс нутгийн хэмжээнд улам өргөжих үү гэдэг нь анхаарлын төвд байна.