Трампыг Туркээс нууцаар нүүлгэн шилжүүлсэн тухай мэдээлэл ил боллоо

АНУ-ын Ерөнхийлөгч Дональд Трампыг Туркийн Анкара хотоос нууцаар нүүлгэн шилжүүлж, өөр онгоцоор АНУ руу буцаасан талаарх мэдээлэл ил боллоо.

“The Washington Post” болон бусад хэвлэлд мэдээлснээр, уг ажиллагаа 2026 оны долоодугаар сарын 8-нд НАТО-гийн дээд хэмжээний уулзалтын дараа болсон байна. АНУ-ын тагнуулын байгууллагууд Иранаас Трампын амь насанд халдах заналхийлэл ирсэн гэж үзсэнтэй холбоотойгоор аюулгүй байдлын тусгай арга хэмжээ авчээ.

Трамп Анкарад ирэхдээ Катарын талаас бэлэглэсэн, шинээр тоноглосон “Boeing 747-8” онгоцоор иржээ. Харин буцах үедээ хуучин “Air Force One” онгоцоор нисэхээр төлөвлөж байгаагаа олон нийтэд мэдэгдэж, сэтгүүлчдийн өмнө уг онгоцонд суусан байна.

Гэвч онгоцонд орсны дараа Трамп болон цөөн тооны ойрын туслахууд өөр хаалгаар гарч, нисэх онгоцны буудлын хоол хүнс тээвэрлэдэг тусгай машинаар далд тээвэрлэгджээ. Улмаар тэднийг бэлэн байдалд байсан “Air Force C-32A” онгоцонд хүргэсэн байна.

Трамп уг онгоцоор Их Британийн Суффолк дахь “RAF Mildenhall” цэргийн бааз руу ниссэн бол түүнийг тээвэрлэж байгаа мэтээр хуучин “Air Force One” онгоц Анкарагаас хөөрчээ. Тус онгоцонд Цагаан ордны хэвлэлийн албаны сэтгүүлчид болон өндөр албан тушаалтнууд сууж явсан байна.

Нислэгийн үеэр сэтгүүлчдэд онгоцны цонхны хаалтыг буулгахыг үүрэгдсэн бөгөөд Трампын хаана байгааг тэд мэдээгүй байжээ. Цагаан ордны хэвлэлийн албаны дарга Стивен Чун уг ажиллагааны талаар тайлбарлахдаа, Ерөнхийлөгчийн аюулгүй байдлыг хангахын тулд шаардлагатай бүх арга хэмжээг авч, болзошгүй заналхийллийг таслан зогсоохын тулд боломжит бүх хэрэгслийг ашиглаж байгааг мэдэгдсэн байна. Харин Пентагон болон АНУ-ын Нууц албанаас ажиллагааны талаар тайлбар өгөхөөс татгалзжээ.