Энэ онд 2000 гаруй залуус "Оюутан цэрэг" хөтөлбөрт хамрагджээ

Монгол Улсын Ерөнхийлөгчийн санаачилгаар 2014 оноос эхлэн хэрэгжүүлж эхэлсэн “Оюутан-цэрэг” хөтөлбөр нь Цэргийн албаны тухай хуулийн нэмэлт өөрчлөлт болон Засгийн газрын тогтоолоор боловсронгуй болж, 1-3 дугаар дамжааны оюутнууд хамрагдах боломжтой болсноор цар хүрээ нь өргөжсөн билээ.

Энэ жилийн сургалтад улсын хэмжээнд 65 их дээд сургууль, коллежийн 2000 гаруй оюутан залуус Үндэсний батлан хамгаалахын их сургууль болон Зэвсэгт хүчний нийт 11 ангийн байрлалд амжилттай хамрагдаж төгслөө.

Хөтөлбөр хэрэгжиж эхэлснээс хойш өнөөдрийн байдлаар 12 мянга гаруй оюутан, суралцагчдад цэргийн анхан шатны мэдлэг олгосон нь үндэсний аюулгүй байдал, сөрөн тэсвэрлэх чадавхыг бэхжүүлэхэд оруулж буй томоохон хөрөнгө оруулалтын нэг болоод байна.

Монгол Улсын Үндсэн хуулиар хүлээсэн иргэний цэргийн үүргээ биелүүлэн “Оюутан цэрэг” цэргийн мэргэжил олгох сургалтад амжилттай хамрагдаж, цэргийн албаны мэдлэг, чадвар эзэмшин эх орондоо үнэнч байх амлалт өгсөн оюутан залуусын цэргийн тангараг өргөх ёслолын ажиллагаа боллоо.