УИХ-ын гишүүн Н.Батсүмбэрэл

AI хөрвүүлсэн

Оюутолгойн ногдол ашиг болох гурван их наяд төгрөгийг иргэдэд бэлнээр олгох асуудлаар хуулийн төсөл боловсруулж, Улсын Их Хурлаар хэлэлцүүлэхээр боллоо. Тус ажлын хэсгийг УИХ-ын гишүүн Н.Батсүмбэрэл ахлан ажиллахаар болсон бөгөөд тэрбээр ажлын хэсгийн үйл ажиллагааны явц, цаашид хэрэгжүүлэх арга хэмжээний талаар дараах мэдээллийг өглөө.

Тэрбээр хэлэхдээ, "Сая УИХ-ын Өргөдлийн болон Эдийн засгийн байнгын хорооны хамтарсан хуралдаан болж, тус хамтарсан хуралдаанаас ажлын хэсэг байгуулахаар шийдвэрлэлээ. Тогтоолын дагуу бид бүрэлдэхүүнээ баталсан бөгөөд энэхүү ажлын хэсгийг миний бие ахлахаар болоод байна. Маргаашаас эхлэн УИХ-ын даргатай зөвшилцөж, Их хурлын даргын зөвлөлөөс гаргадаг ажлын хэсгүүдийн хуваарьт тусгуулан, энэ долоо хоногт багтаан эсвэл ирэх долоо хоногоос хуралдаанаа эхлүүлнэ" хэмээн тодотгов.

Мөн ажлын хэсгийн үндсэн чиг үүргийн талаар УИХ-ын гишүүн Н.Батсүмбэрэл: "Ажлын хэсэг нь иргэдээс ирүүлсэн өргөдөл, гомдол, саналыг нарийвчлан нягталж үзэх, УИХ-ын гишүүдийн байр суурийг сонсож судлах, түүнчлэн өнөөдөр мөрдөгдөж буй хууль эрх зүйн боломжийг бүрэн шалгах үүрэгтэй. Мөн Засгийн газраас тодорхой санал, байр суурийг нь заавал сонсож байж эцсийн саналаа гаргана. Иргэдийн хүсэж буйчлан мөнгөн хэлбэрээр буюу бэлнээр тараах уу, эсвэл өөр хэлбэрээр хүргэх үү, эсхүл улс орны өмнө тулгамдаж байгаа томоохон бүтээн байгуулалтын ажлууд руу чиглүүлж шийдвэрлэх үү гэдгийг ажлын хэсэг тал бүрээс нь хэлэлцэж, саналаа боловсруулан өргөн барих юм" гэдгийг онцоллоо.

Уг ажлын хэсэгт парламентын нам намын төлөөлөл, бүлгүүдийн гишүүд багтсан тул гишүүн бүрээс бичгээр санал авч, нэгдсэн санал дүгнэлт гаргахаар төлөвлөжээ. Гишүүдийн хувьд ахмад настнуудад бэлнээр олгох, хүүхдүүдийн хувийг Баялгийн санд хуваарилах зэрэг олон төрлийн санал, байр суурьтай байгааг тэрбээр дурдав. Түүнчлэн, шаардлагатай хууль тогтоомжид өөрчлөлт оруулах санал, дүгнэлтийг ажлын хэсгээс боловсруулан ажиллах зайлшгүй шаардлага үүсэж байгааг тэмдэглэв.

Түүнчлэн иргэдийн санаа бодлыг тусгах тухайд "Нийтийн өргөдлийн системээр 100 мянга гаруй иргэн санал санаачилга гаргаж гарын үсэг зурсан. Иргэдийн зүгээс 857 мянган төгрөгийг бэлнээр авах хүсэлтэй байна уу, эсвэл өөр хэлбэрээр хүртэх саналтай байна уу гэдгийг бид сайтар сонсож, ажлын хэсгийн үйл ажиллагаанд бүрэн тусгаж ажиллана. Иргэдийн хувьд энэ асуудлыг нэн даруй шийднэ гэсэн өндөр хүлээлттэй байна" гэв.

Төгсгөлд нь Оюутолгойн ногдол ашгийн нөхцөл байдлын талаар өгүүлэхдээ, "Оюутолгойн ордын ногдол ашгийн тухайд сүүлийн 10 гаруй жилийн турш олон талын маргаан, мэтгэлцээн өрнөж ирсэн. Энэ бол Монгол Улсад байгаа хамгийн том гадаадын хөрөнгө оруулалт, стратегийн томоохон төсөл бөгөөд одоо л бодит үр өгөөжөө өгөх шатандаа орж байна. Одоогийн Засгийн газар сайн ажилласны үр дүнд анх 2037 оноос эхлэн авахаар тооцоолж байсан ногдол ашгийг 2027 оноос авахаар болж наашилсан. Бид энэ асуудлыг илүү баталгаажуулах ёстой. Сангийн сайдын мэдээлснээр одоогоор албан захидал ирээд байгаа бөгөөд байнгын хорооны хуралдаанд танилцуулсан. Цаашид хэлэлцээр бүрэн баталгаажиж, яг бодитойгоор ямар хэмжээний ногдол ашиг төвлөрөх, түүнийг нийт ард түмэнд ямар хэлбэрээр хүртээх вэ гэдэг саналууд ажлын хэсгийн хүрээнд нарийвчлан яригдаж, зарим хуульд нэмэлт, өөрчлөлт оруулах асуудал шийдэгдэнэ" гэлээ.

Сэтгэгдэл (0)

Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.