Синалоа картелийн толгойлогч "Эль Майо"-д бүх насаар нь хорих ял оноолоо
АНУ-ын Нью-Йорк хотын Бруклин дүүргийн холбооны шүүхээс Мексикийн хар тамхины алдарт "Синалоа" картелийн үүсгэн байгуулагчдын нэг, өдгөө 76 настай Исмаэль "Эль Майо" Замбада Гарсиад бүх насаар нь хорих ял оноож, хууль бус үйл ажиллагаанаас олсон 15 тэрбум ам.долларын хөрөнгийг нь хураах шийдвэр гаргажээ.
Шүүгч Брайан М.Коган 2026 оны долоодугаар сарын 20-ны өдөр энэ түүхэн шийдвэрийг танилцуулсан бөгөөд энэ нь АНУ-ын хууль хяналтынхны хувьд хар тамхины бүлэглэлийн эсрэг хийсэн хамгийн том тэмцлийн нэг болж байна.
Замбада нь бараг 40 жилийн турш кокаин, фентанил, героин, марихуан зэрэг үхлийн аюул өндөртэй бодисуудыг АНУ-ын хилээр нэвтрүүлсэн хэргээ хүлээсэн юм.
Тэрээр 2025 оны наймдугаар сарын 25-ны өдөр прокуроруудтай хэлэлцээр байгуулж, гэмт бүлэглэлийг удирдсан болон хууль бус хуйвалдаан зохион байгуулсан зэрэг олон тооны яллах дүгнэлтийг хүлээн зөвшөөрсөн байна. Ийнхүү хэргээ хүлээснээр цаазаар авах ялаас мултарч чаджээ.
Шүүх хуралдааны үеэр Замбада цайвар шаргал өнгийн хорих хувцастай, буурал үс, сахалтай гарч ирсэн бөгөөд хөл нь доголж байв. Түүний өмгөөлөгч Фрэнк Перес үйлчлүүлэгчийнхээ өндөр нас, эрүүл мэндийн байдлыг харгалзан шоронгийн эмнэлэгт хэвтүүлэх хүсэлт гаргасан ч прокурорууд аюулгүй байдалд нь эрсдэлтэй хэмээн татгалзжээ.
Замбада шүүхийн өмнө испани хэлнээс хөрвүүлсэн захидлаа уншиж, хийсэн хэрэгтээ гэмшиж байгаагаа илэрхийлээд, хойч үеийнхэндээ өөр зам сонгохыг уриалсан байна. Тэрээр "Ийм дайнд хэн ч ялдаггүй. Миний учруулсан хохирол болон үзүүлсэн муу үлгэр жишээнд хүлцэл өчье. Хүчирхийлэл зогсох ёстой" хэмээн мэдэгджээ.
Олон арван жилийн турш АНУ-ын хууль хүчнийхний хамгийн их эрэн сурвалжилж байсан Замбада нь "Эль Чапо" хочит Хоакин Гусмантай хамтран авлига, зэвсэгт дайчдын тусламжтайгаар эрх мэдлээ тогтоож байсан нэгэн юм. Гэвч түүний ноёрхол 2024 оны долоодугаар сард Техас болон Нью-Мексико мужийн хилийн ойролцоох нисэх зурваст баривчлагдсанаар дуусгавар болсон юм. Замбада өөрийгөө Эль Чапогийн хүү Хоакин Гусман Лопест хулгайлагдаж, АНУ-д хүчээр хүргэгдсэн гэж мэдэгддэг. Түүнийг баривчлагдсаны дараа Мексикийн Синалоа мужид түүний талынхан болон Эль Чапогийн хөвгүүдийн хооронд эрх мэдлийн төлөөх цус асгаруулсан ширүүн тэмцэл дэгдсэн байна.
АНУ-ын Хууль зүйн яам энэ шүүхийн шийдвэрийг 2019 онд Эль Чапод бүх насаар нь хорих ял оноосноос хойших хамгийн чухал амжилт хэмээн онцолжээ. АНУ-ын прокурор Жозеф Ночелла "Исмаэль Замбада Гарсиа бараг дөрвөн аравны турш тэрбум тэрбумын ашиг олохын тулд Америкийн хотуудыг хордуулж, замд нь саад болсон хэн бүхнийг хөнөөх тушаал өгч байсан. Өнөөдөр тэрхүү хар түүх бүрмөсөн төгсгөл боллоо" гэж мэдэгдсэн юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.