БИЧЛЭГ: Хятадын өмнөд хэсэгт үерийн улмаас 1000 орчим могой усанд алдагджээ

БНХАУ-ын өмнөд нутгийн Гуанси-Жуаны өөртөө засах орны Хэнжоу хотын Дэнвэй тосгонд 2026 оны 7 дугаар сарын 6-ны өглөө хүчтэй үерийн улмаас могой үржүүлгийн ферм сүйрчж, 800-1000 орчим могой үерийн усанд алдагдсан ноцтой хэрэг гарчээ.

"Мэйсак" хар салхины улмаас орсон аадар борооны улмаас ойролцоох усан сангуудын далан сэтэрч, үерийн ус могой үржүүлгийн газрын ханыг нурааснаар эдгээр хэвлээр явагчид орон сууцны хорооллууд руу урсан оржээ. Алдагдсан могойнуудын дунд нэн аюултай, хортой кобра болон хоргүй хархны могойнууд байгаа нь орон нутгийн оршин суугчдыг гүн айдаст автуулаад байна.

Орон нутгийн албаны төлөөлөгчийн мэдээлснээр, могойнуудын дийлэнх нь хүчтэй урсгалд урссан боловч олон тооны могой үерийн усан дээр хөвөх хог хаягдал, мод болон байшингийн дээвэр дээр хоргодон үлджээ. Хятадын нийгмийн сүлжээний "Вэйбо" (Weibo) платформд толгойгоо гозойлгосон кобра могойнууд усан дээгүүр хөвж буй бичлэгүүд эрчимтэй тархаж, холбогдох хаштагууд нь богино хугацаанд 180 сая гаруй хандалт аваад байна.

Могойнууд алдагдсаны улмаас тосгоны хэд хэдэн оршин суугч хазуулж, эмнэлгийн яаралтай тусламж авах шаардлагатай болжээ. Тухайлбал, нэгэн иргэний ээж хортой могойд хазуулсны улмаас шоконд орсон байна. Гэвч үерийн ус хэт өндөр хэмжээнд хүрснээс зам харгуй бүрэн хаагдаж, аврах багийнхан болон түргэн тусламжийн машинууд бэртсэн хүмүүсийг эмнэлэгт хүргэж чадахгүй гацаад байна.

Наньнин хотын нэгдүгээр ардын эмнэлэгт шаардлагатай хорны эсрэг ийлдэс бэлэн байгаа боловч үерийн бүс рүү тээвэрлэх боломжгүй байгаа юм. Албаны хүмүүс дроноор ийлдэс хүргэх хувилбарыг авч хэлэлцсэн ч нислэгийн зай хэт хол байгаа тул уг төлөвлөгөөг хэрэгжүүлэх боломжгүй гэж үзжээ.

Одоогийн байдлаар орон нутгийн аврагчид болон сайн дурын 12 иргэнээс бүрдсэн баг хамтран могойнуудыг барих ажиллагааг зохион байгуулж байна. Тэд загасны тор болон цахилгаан гүйдлээр цохигч тусгай буу ашиглан усан дээрх могойнуудыг барьж байгаа аж. Дэнвэй тосгоны хорооны дарга оршин суугчдад хандан могойг нүцгэн гараараа барихыг оролдохгүй байхыг хатуу анхааруулж, сонор сэрэмжтэй байхыг уриаллаа. Аврах ажиллагаа үерийн усны түвшин болон цаг агаарын хүнд нөхцөл байдлаас шалтгаалан удаашралтай үргэлжилж байна.

Энэхүү үйл явдал нь БНХАУ-д долоодугаар сарын 1-нээс албан ёсоор эхэлсэн борооны улирлын үеэр тохиож буй байгалийн гамшгийн нэг хэсэг юм.

Дэлхийн дулаарал болон Эл Ниньо үзэгдлийн нөлөөгөөр тус улсын өмнөд бүс нутагт түүхэнд байгаагүй хүчтэй аадар бороо орж, хөрсний нуралт үүсэн, зарим газарт ховор тохиох хар салхи дэгдээд байна. Байгалийн гамшгийн улмаас улсын хэмжээнд хамгийн багадаа 15-20 хүн амиа алдаж, 330 гаруй хүн бэртэж гэмтсэн бөгөөд БНХАУ-ын дарга Ши Жиньпин гамшгаас аврах, иргэдийг нүүлгэн шилжүүлэх болон эмнэлгийн тусламж үзүүлэх ажилд бүх хүчээ дайчлахыг үүрэг болгоод байна.