🔴LIVE: Монголын үндэсний агаарын тээвэрлэгч “МИАТ” ТӨХК-ийн 70 жилийн ойн баярын хурал эхэллээ

МИАТ ТӨХК-ийн түүхт 70 жилийн ой тохиож, агаарын хөлгийн паркаа шинэчлэх хэлэлцээрийг эхлүүллээ

Монгол Улсад нисэх хүчин үүсэж хөгжсөний түүхт 101 жилийн ой болон Үндэсний агаарын тээвэрлэгч "МИАТ" ТӨХК үүсгэн байгуулагдсаны 70 жилийн ойн баярын хурал, хүндэтгэлийн арга хэмжээ боллоо. Баярын хурлыг нээж Засгийн газрын гишүүн, Зам, тээврийн сайд Б.Дэлгэрсайхан болон Төрийн өмчийн бодлого, зохицуулалтын газрын дарга Б.Цэнгэл нар үг хэлж, салбарын нийт ажилтан, албан хаагчид болон ахмад зүтгэлтнүүдэд баярын мэндчилгээ дэвшүүлэв.

Зам, тээврийн сайд Б.Дэлгэрсайхан хэлсэн үгэндээ, 1956 онд анхны нислэгээ үйлдэж байсан "МИАТ" компани өнөөдөр үндэсний агаарын тээврийн салбарын манлайлагч болон хөгжсөнийг онцлов. Өдгөө тус компани орчин үеийн 10 агаарын хөлгөөр олон улсын 14, орон нутгийн 10 чиглэлд тогтмол нислэг үйлдэж байна. Түүхэн хугацаандаа 25.7 сая зорчигчийг аюулгүй тээвэрлэж, дэлхийг 13.7 мянга гаруй удаа тойрсонтой тэнцэх хэмжээний замыг туулжээ. Мөн цар тахлын хүнд жилүүд болон Ойрхи Дорнодын хямралт нөхцөл байдлын үед тусгай үүргийн нислэг үйлдэж, элэг нэгтнүүдээ эх оронд нь авчирсан баатарлаг гавьяаг салбарын сайд онцгойлон тэмдэглэлээ.

Цаашид "МИАТ" ТӨХК-ийн санхүүгийн дарамтыг бууруулах, парк шинэчлэл хийх зорилгоор томоохон алхам хийж байгааг сайд дуулгав. Өнөөдрийн байдлаар ашиглаж буй 10 агаарын хөлгийн 9-ийг нь түрээсээр ажиллуулж байгаа нь санхүүгийн хүндрэл учруулдаг байна. Иймд "Airbus" компаниас агаарын хөлөг худалдан авахаар Бүгд Найрамдах Франц Улсын төрийн өмчит хөрөнгө оруулалтын банк "Bpifrance" болон Монголын Худалдаа хөгжлийн банктай санхүүжилтийн урт хугацааны хэлэлцээ хийж байгааг мэдээллээ. Засгийн газраас агаарын тээврийн либералчлалыг эрчимжүүлж, "Чингис хаан" олон улсын нисэх буудлыг бүс нутгийн зангилаа болгох бодлогыг тууштай хэрэгжүүлж байна.

Төрийн өмчийн бодлого, зохицуулалтын газрын дарга Б.Цэнгэл мэндчилгээндээ, "МИАТ" компани нь зөвхөн бизнесийн байгууллага бус төрийн өмчит компанийн хувиар нийгмийн хариуцлагыг давхар үүрч ирснийг тэмдэглэв. Тэрээр тус компани олон улсын аудитын шалгалтаар газрын үйлчилгээ болон аюулгүй ажиллагааны чиглэлээр 97-98 хувийн өндөр үнэлгээ авсныг онцолж, энэ нь дэлхийн хэмжээнд ховор амжилт болохг дурдлаа. Хувьцаа эзэмшигчийн зүгээс чанартай үйлчилгээ болон ашигт ажиллагааг шаарддаг ч сүүлийн жилүүдийн хүндрэлийг амжилттай даван туулж байгаад талархал илэрхийлэв.

Баярын хурлын үеэр Монгол Улсын Ерөнхийлөгчийн зарлигаар иргэний нисэхийн салбар болон "МИАТ" ТӨХК-д олон жил үр бүтээлтэй ажилласан зарим удирдлагууд, инженер техникийн ажилтан, нисгэгчдийг төрийн дээд одон медалиар шагнасныг Зам, тээврийн сайд Б.Дэлгэрсайхан, ТӨБЗГ-ын дарга Б.Цэнгэл нар гардуулан өглөө.