Австралийн Ерөнхий сайд нэрт дуучин Кайли Миноугийн талаарх хэлсэн үгийнхээ төлөө уучлалт гуйлаа
Австралийн Ерөнхий сайд Энтони Албаниз хошин шогийн подкастад оролцохдоо алдартай дуучин Кайли Миноугийн талаар зохисгүй хошигносондоо олон нийтийн хүчтэй шүүмжлэлд өртөж, 2026 оны долоодугаар сарын 6-ны даваа гаргийн өглөө албан ёсоор уучлалт гуйжээ.
Канберра дахь албан ёсны өргөөндөө бичүүлсэн нэвтрүүлгийн үеэр тэрээр гэр бүлийн амьдрал болон алдартай эмэгтэйчүүдийн талаар ярьсан бөгөөд түүний хэлсэн үг улс төрийн хүрээнд болон олон нийтийн дунд томоохон шуугиан дагуулаад байв. Засгийн газрын тэргүүн Номхон далайн орнуудад хийх айлчлалынхаа өмнө богино хэмжээний мэдэгдэл гаргаж, гаргасан алдаагаа хүлээн зөвшөөрсөн байна.
Маргаан дагуулсан яриа долоодугаар сарын 3-ны баасан гарагт цацагдсан жүжигчин Никки Осборны хөтөлдөг "Bush Deep" хэмээх хошин шогийн подкастын үеэр болжээ.
Нэвтрүүлгийн үеэр хөтлөгч Ерөнхий сайдаас Кайли Миноуг, Николь Кидман, Ронда Бёрчмор нарын гурван алдартан бүсгүйгээс хэнтэй нь гэрлэж, болзож, унтах вэ гэсэн асуултад хариулахыг шаардсан байна. Өнгөрсөн оны арваннэгдүгээр сард Жоди Хэйдонтой гэрлэсэн Албаниз эхэндээ гэрлээд ердөө зургаан сар болж байгаагаа хэлж бултахыг оролдсон ч хөтлөгч шалсаар байжээ.
Улмаар тэрээр Кайли Миноугийг сонгож, түүнтэй гэрлэж, болзож, унтахад бэлэн байгаагаа илэрхийлэн "Дээрх бүгдийг хийнэ. Тэр үнэхээр гайхалтай" хэмээн хариулсан нь шүүмжлэлийн бай болов.
Үүнээс гадна Ерөнхий сайд эхнэртэйгээ бэлгийн харилцаанд орох давтамжийн талаарх асуултад хошигнон хариулсан нь гал дээр тос нэмсэн хэрэг болжээ.
Сөрөг хүчний Либерал намаас сонгогдсон Сенатч Сара Хендерсон Ерөнхий сайдын энэ үйлдлийг эмэгтэйчүүдийг үл хүндэтгэсэн, австраличуудыг ичгэвтэр байдалд оруулсан бөгөөд Ерөнхий сайдын албан тушаалын нэр хүндийг унагасан хэрэг хэмээн буруутгав. Түүнчлэн бие даасан гишүүн Зали Стеггалл Засгийн газрын тэргүүнийг сексист хандлагын эсрэг үлгэр жишээ үзүүлэхийн оронд өөрөө ийм тоглоомд оролцсон нь туйлын зохисгүй үйлдэл хэмээн шүүмжилсэн байна.
Харин Хөдөлмөрийн намын сайд Таня Плиберсек Ерөнхий сайдыг өмөөрч, түүнийг зүгээр л Кайли Миноугийн шүтэн бишрэгч гэдгээ илэрхийлсэн хэмээн тайлбарлажээ.
Гэвч олон нийтийн зүгээс ирэх шахалт нэмэгдсээр байсан тул Ерөнхий сайдын ажлын албанаас "Би хэлсэн үгийнхээ төлөө эргэлзээгүйгээр уучлалт гуйж байна" гэсэн ганц өгүүлбэртэй мэдэгдлийг яаралтай гаргасан байна. Уг мэдэгдэл нь түүнийг гадаад улсыг зорихоос өмнө гарсан бөгөөд маргааныг намжаах зорилготой байв.
Дуулианы гол дүр болох поп од Кайли Миноуг одоогоор ямар нэгэн албан ёсны тайлбар хийгээгүй байна. Тэрээр амралтын өдрүүдэд Лондон хотод болсон "Snow Patrol" хамтлагийн тоглолтод гэнэтийн бэлэг барин оролцож, уран бүтээлийн карьертаа анхаарлаа хандуулсаар байгаа аж.
Эх сурвалж:
• cp24.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.