“Чөлөөлье” санаачилга хүнд суртлыг бууруулахад чиглэнэ
Монгол Улсын Засгийн газраас хэрэгжүүлж буй “Чөлөөлье” үндэсний санаачилгын хүрээнд Монгол Улсын Ерөнхий сайд Н.Учрал, нийслэлийн Засаг дарга бөгөөд Улаанбаатар хотын Захирагч Б.Пүрэвдагва нар нийслэлийн есөн дүүрэг, 204 хорооны төлөөлөл оролцсон зөвлөгөөнд өнөөдөр Төрийн ордонд оролцлоо.
Зөвлөгөөний үеэр санаачилгын хүрээнд хэрэгжүүлсэн ажлын үр дүнг дүгнэж, Засгийн газар болон нийслэлийн цаашдын бодлого, чиглэлийг хэлэлцэв. “Чөлөөлье” үндэсний санаачилга нь төрийн үйлчилгээний хүнд суртлыг бууруулах, давхардсан дүрэм журам, шаардлагагүй зөвшөөрлийг цөөлөх, үйлчилгээг илүү шуурхай, цахим хэлбэрт шилжүүлэхэд чиглэж байна.
Энэ ажлын хүрээнд нийслэлээс үйлдвэрлэл, үйлчилгээ эрхлэхтэй холбоотой 80 гаруй төрлийн зөвшөөрлийг цахимаар олгох ажлыг хэрэгжүүлж, шат дамжлагыг багасган үйлчилгээний хүртээмжийг нэмэгдүүлжээ.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва хэлсэн үгэндээ хотын хөгжлийг зөвхөн бүтээн байгуулалтаар бус иргэдийн амьдралын чанарын ахиц дэвшлээр хэмжих ёстойг онцлов. Тэрбээр төрийн хэт оролцоог бууруулж, хувийн хэвшлийн хөгжлийг дэмжих, төрийн үйлчилгээнд процессын шинэчлэл хийж, илүүдэл шат дамжлагыг арилган цахим шийдлийг эрчимжүүлэхээ илэрхийллээ.
Мөн “Чөлөөлье” санаачилга нь иргэд, аж ахуйн нэгжүүдэд илүү их боломж нээж, төрийн бүтээмж болон хотын өрсөлдөх чадварыг нэмэгдүүлэх бодит ажил болно гэдэгт итгэлтэй байгаагаа онцолсон юм.
Сурталчилгаа
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.