Өмнөд Африкчууд цагаачдыг албадан гаргахыг шаардсан жагсаал хурцадлаа

Өмнөд Африк улсад хууль бус цагаачдыг албадан гаргахыг шаардсан үндэсний хэмжээний эсэргүүцлийн жагсаал хурцадмал байдалд хүрч, эмх замбараагүй байдал үүслээ.

Жасинта Нгобесе-Зумагийн удирдсан "March and March" хөдөлгөөн тэргүүтэй консерватив үндсэрхэг үзэлтэй 20 гаруй байгууллагын эвсэл зургаадугаар сарын 30-ны дотор бичиг баримтгүй гадаадын иргэдийг тус улсаас гарахыг шаардсан байна. Энэхүү шаардлагын улмаас Претори, Йоханнесбург, Дурбан, Кейптаун зэрэг томоохон хотуудад олон мянган хүнийг хамарсан жагсаал өрнөж байна. 

Жагсагчид ажилгүйдэл, эрүүл мэнд, боловсролын салбарын ачаалал болон гэмт хэргийн өсөлтөд хууль бус цагаачдыг буруутгаж байна. 

Мод, бамбай барьсан жагсагчид гал тавьж, орон нутгийн бизнесүүдийг хаахад хүргэсэн бөгөөд цагдаа нартай мөргөлдсөн байна. 

Эмх замбараагүй байдлын үеэр цагдаагийн байгууллагаас 900 гаруй хүнийг баривчилсан байна. Тэдний 300 орчим нь бичиг баримтгүй цагаачид байсан бол үлдсэн хэсэг нь олон нийтийн газар хүчирхийлэл үйлдсэн, тонуул хийсэн, бусдын эд хөрөнгийг сүйтгэсэн нутгийн иргэд болон жагсагчид байв. 

Уганда, Малави, Зимбабве зэрэг хөрш орнуудын засгийн газрууд иргэдээ нүүлгэн шилжүүлэх ажлыг яаралтай зохион байгуулж, одоогоор 25 мянга орчим цагаачийг эх оронд нь буцаажээ.

Өмнөд Африкийн Ерөнхийлөгч Сирил Рамафоса иргэдийн тогтоосон хугацааг хүчингүй гэж үзэж, зөвхөн төрийн эрх бүхий байгууллага цагаачлалын хуулийг хэрэгжүүлэх эрхтэйг мэдэгдлээ. Тэрээр цагаачлалын шинэчлэл хийх шаардлагатайг хүлээн зөвшөөрсөн ч иргэдийг зэвсэг барихгүй, хүчирхийлэл үйлдэхгүйгээр тайван замаар үзэл бодлоо илэрхийлэхийг уриалав.

Судлаачид жагсагчдын гаргасан үндэслэлийг няцааж, гадаадын иргэдийн эрхэлж буй бүх ажлын байрыг нутгийн иргэдэд шилжүүлсэн ч ажилгүйдлийн түвшин ердөө зургаа орчим хувиар буурах боломжтойг тэмдэглэжээ. "March and March" хөдөлгөөнийхөн шаардлагыг нь биелүүлэх хүртэл долоо хоног бүрийн Пүрэв гарагт жагсаал зохион байгуулна хэмээн мэдэгдээд байна. 

Эх сурвалж:

• eagle.mn

• theguardian.com

• sbs.com.au

• time.com

•