🔴Хотын дарга Б.Пүрэвдагва: КОП17 хурлаас босгосон хөрөнгө оруулалтынхаа араас Нийслэлийн 13 хүн гадагшаа явсан

Нийслэлийн удирдлагууд гадаад томилолт, нийтийн тээврийн шинэчлэл болон өвөлжилтийн бэлтгэл ажлын талаар мэдээлэл өглөө

Нийслэлийн Засаг дарга Б.Пүрэвдагва сүүлийн үед олон нийтийн анхаарлыг татаж буй асуудлууд болох гадаад томилолт, нийтийн тээврийн паркийн шинэчлэл, дүүжин тээвэр, шөнийн марафон болон агаарын бохирдлыг бууруулах өвлийн бэлтгэл ажлын хүрээнд хийгдэж буй арга хэмжээнүүдийн талаар дэлгэрэнгүй мэдээлэл өглөө.

Тэрбээр хэвлэл мэдээллийн хэрэгслээр гарч буй зарим ташаа мэдээлэлд тайлбар өгөхдөө: “НҮБ-ын Цөлжилттэй тэмцэх суурь конвенцын талуудын 17 дугаар бага хурал (COP17)-ын үеэр Улаанбаатар хот 400 орчим сая ам.долларын хөрөнгө оруулалтын асуудлыг шийдвэрлэж, олон улсын таван байгууллагатай хамтран ажиллах санамж бичигт гарын үсэг зурсан. Тэдгээрийн нэг нь дэлхийд технологиор тэргүүлэгч ‘BYD’ компани юм. Санамж бичигт ‘Скай шаттл’ (SkyShuttle) хэмээх нийтийн тээврийн хамгийн сүүлийн үеийн дэвшилтэт технологийг нийслэлд нэвтрүүлэх заалт тусгагдсан” хэмээн онцлов.

Нийслэлийн удирдлагуудын зүгээс сүүлийн 20–30 жил яригдсан метро болон трамвайн бүтээн байгуулалтыг 2027 онд эхлүүлж, тухайн оны 11–12 сар гэхэд иргэдэд шинэ төрлийн нийтийн тээврийн үйлчилгээг бодитоор хүргэх зорилт тавин ажиллаж байна. Энэ хүрээнд наймдугаар сарын 28-нд хуралдаан өндөрлөсний дараахан буюу есдүгээр сарын 5-ны өдөр ажлын хэсэг ‘BYD’ компанийн төв оффис байрлах Шэньжэнь хотыг зорьжээ. Тус хот руу шууд нислэг байхгүй тул Хонконгоор дамжин очсон байна.

Томилолтын үеэр нийслэлийн баг бүрэлдэхүүн ‘BYD’ компанийн дэд ерөнхийлөгч Майкл Шү болон тус компанийн инженерийн багуудтай уулзсан байна. ‘BYD’ компанийн зүгээс ‘Скай шаттл’ төслийн баг, ‘Blade Battery’ буюу илдэн батарейн мэргэжилтнүүд, түүнчлэн 1040 км туулах чадвартай автомашиныг ердөө 9 минутад цэнэглэдэг дэвшилтэт хурдан цэнэглэгчийн баг зэрэг нийт дөрвөн техникийн баг, удирдлагуудтай таван удаагийн албан уулзалт хийжээ.

Уг томилолтын бүрэлдэхүүн болон зардлын тухайд “Нийт 13 хүний бүрэлдэхүүнтэй явсан. Цахим орчинд мэдээлж байгаа шиг 150 сая төгрөг гэсэн өндөр дүн гараагүй. Шийдвэр гаргах түвшний албаныхан болон техникийн багийнхан газар дээр нь очиж, туршилт болон ТЭЗҮ-ийг 12 дугаар сарын 5-ны дотор ‘BYD’ компаниар хийлгэх зэрэг нарийн асуудлуудыг тохирсон. Энэ бол зугаалга биш, хотын ирээдүйн их бүтээн байгуулалтын хариуцлагатай ажил байсан. Зөвхөн 13 хүний онгоцны тийзийн зардал ЗДТГ-аас гарсан” гэдгийг тодотголоо. Түүнчлэн дараагийн ажлын хэсэг БНСУ-д ажиллаж, ‘GGGI’ байгууллагатай 250 сая ам.долларын санхүүжилтийг баталгаажуулахаар ажиллаж байгааг дурдав. Нийслэлийн төсөл хөтөлбөрүүдийн 93–95 хувь нь зөвхөн төсвийн хөрөнгөөр хэрэгжиж буй гажуудлыг халж, гадаад хөрөнгө оруулалтын эх үүсвэрийг 10 хувьд хүргэхээр зорьж байгаа аж.

Шөнийн марафоны зохион байгуулалт ба зам хаалтын тухайд:

Өнгөрсөн бямба гарагт зохион байгуулагдсан шөнийн марафоны улмаас иргэдээс гарсан бухимдал, шүүмжлэлд хариулахдаа уг арга хэмжээ нь хувийн хэвшлийн залуусын санаачилга байсныг онцоллоо. Нийслэлийн болон улсын төсвөөс нэг ч төгрөг гараагүй бөгөөд хотын зүгээс зөвхөн олон нийтийн аюулгүй байдлыг хангах чиглэлээр хамтран ажилласан байна. Түгжрэл болон зам хаалттай холбоотой алдаа гарсан тул цаашид тус гүйлтийг төв замаар хийхгүй байх шийдвэр гаргажээ. Дараа дараагийн марафоныг Үндэсний цэцэрлэгт хүрээлэн, захын дүүргүүд тухайлбал Баянзүрх, Налайх болон “Playtime” наадмын дэд бүтэц тавигдсан талбайд зохион байгуулахаар төлөвлөж байгааг дурдав.

Дүүжин тээврийн ажлын явц:

Нийслэлд хэрэгжиж буй дүүжин тээврийн төслийн техникийн туршилтууд хуваарийн дагуу үргэлжилж байна. Буудлуудын цахилгаан холболт, халуун хүйтэн ус, тохижилтын ажлыг 12 дугаар сарын 15-ны дотор бүрэн дуусгахаар шахаж ажиллаж буйг мэдээллээ. Дэлхийн 27 оронд аюулгүй ашиглагдаж буй тээврийн хэрэгсэл тул аюулгүй байдалд эргэлзэх шаардлагагүйг тэмдэглэв.

Нийтийн тээврийн паркийн шинэчлэл:

Өнөөдрийн байдлаар нийслэлд 1160 автобус үйлчилгээнд явж байна. Энэ жилийн паркийн шинэчлэлийн хүрээнд:

• 60 цахилгаан автобус,
• 50 дунд оврын автобус,
• 40 хүүхдийн автобус авах сонгон шалгаруулалт эцэслэх шатандаа оржээ.

Өвөлжилтийн бэлтгэл ба сайжруулсан түлшний чанар:

Агаарын бохирдлыг өнгөрсөн онд 30–33 хувиар бууруулсан бол энэ жил 40 хувьд хүргэх зорилттой байна. “Тавантолгой түлш” компанийн Зүүн үйлдвэр өдөрт 1400 тонн түлш үйлдвэрлэж байгаагаас гадна 10 мянган тонн хагас кокс туршилтаар орж иржээ. Түүнчлэн 5 мянган айл өрхийг хийн халаалтад шилжүүлж, нийслэлийн агаарын бохирдлын 12 хувийг эзэлдэг 273 уурын зуухнаас энэ зун наймыг нь хийн түлшинд шилжүүлсэн байна.

Өнгөрсөн жил гарсан иргэдийн гомдлын дагуу түлшний жинг шалгахад шуудай тутамдаа 25.1-ээс 25.3 кг жинтэй буюу дутагдалгүй гарч буйг шалгалтаар баталгаажуулсан байна. Түлшний үнэ 5000 төгрөгөөр хэвээр хадгалагдах бөгөөд жил бүр төсвөөс олгодог 300 тэрбум төгрөгийн татаасыг зогсоохын тулд НИТХ-аас наймдугаар сарын 6-нд нүүрс пиролизийн үйлдвэр барих шийдвэр гаргаж, одоогоор есөн аж ахуйн нэгжийн сонгон шалгаруулалт үргэлжилж байгааг мэдээллээ.