ОХУ-д Их Британи гэх нэршлээс татгалзаж, Британи гэж нэрлэх тухай хэлэлцэж байна
ОХУ-ын Холбооны Зөвлөлийн орлогч дарга Константин Косачев 2026 оны долоодугаар сарын 3-ны өдөр ТАСС агентлагт өгсөн ярилцлагадаа "Их Британи" гэх нэршлийн "Их" хэмээх угтвараас татгалзаж, тус улсыг зөвхөн "Британи" гэж нэрлэх санаачилгыг идэвхтэй дэмжиж байгаагаа илэрхийлжээ.
Түүний хэлснээр, Лондон өөрийн "агуу байх дон"-гоо олон улсын хамтын нийгэмлэгт тулган хүлээлгэсэн бөгөөд бусад улс орнууд үүнийг зөвшөөрөх албагүй гэж үзэж байна. Энэхүү мэдэгдэл нь Оросын улс төрчдийн дунд өрнөж буй Британийн албан ёсны нэршлийг өөрчлөх тухай хэлэлцүүлгийг дахин идэвхжүүлэв.
Энэхүү маргаан анх 2026 оны нэгдүгээр сарын 20-ны өдөр ОХУ-ын Гадаад хэргийн сайд Сергей Лавров 2025 оны дипломат ажлын үр дүнг танилцуулах хэвлэлийн бага хурлын үеэр гаргасан мэдэгдлээс эхэлсэн юм. Сайд Лавров "Их Британи" гэхийн оронд "Британи" гэж нэрлэхийг санал болгохдоо тус улсыг өөрийгөө албан ёсоор "агуу" хэмээн нэрлэдэг орчин үеийн цорын ганц жишээ гэж тодорхойлжээ. Тэрээр үүнтэй ижил төстэй цорын ганц түүхэн жишээ нь 2011 онд оршин тогтнохоо больсон "Агуу Социалист Ардын Ливийн Арабын Жамахири" улс байсныг дурдсан байна.
Сайдын мэдэгдлийн дараа буюу 2026 оны нэгдүгээр сарын 21-нд Алтайн хязгаарын Хууль тогтоох хурлын депутат, "Оросын коммунистууд" намын дарга Сергей Малинкович уг санаачилгыг хуульчлан баталгаажуулахыг уриалжээ.
Тэрээр сурах бичиг, газар зүйн зураг, хэвлэл мэдээллийн хэрэгсэл болон албан ёсны баримт бичгүүдээс "Их" гэх үгийг хасах санал гаргасан байна. Үүнээс гадна Малинкович Санкт-Петербург хотын Английн далан болон Английн өргөн чөлөөг БНАСАУ-ыг хүндэтгэх үүднээс Пхеньяны далан, Пхеньяны өргөн чөлөө болгон өөрчлөх санал дэвшүүлсэн ч энэ нь англи хэл сурахаас татгалзах, эсвэл үзэн ядалтыг өдөөх алхам биш гэдгийг онцолжээ.
Оросын талаас гаргасан энэхүү санаачилгад Их Британийн тал тайван хандсан байна. 2026 оны тавдугаар сарын 8-ны өдөр Их Британиас ОХУ-д суугаа Элчин сайд Найжел Кейси RTVI телевизэд өгсөн ярилцлагадаа Орос улс өөрийн орос хэл дээрх Нэгдсэн Вант Улсын нэршлийг хүссэн өдрөө өөрчлөх бүрэн эрхтэй хэмээн тайлбарлажээ.
Оросын улс төрийн хүрээнд өрнөж буй энэхүү нэршлийн өөрчлөлтийн асуудал нь цаашид албан ёсны шийдвэр болон хэрэгжих эсэх нь тодорхойгүй байгаа ч хоёр орны дипломат харилцааны өнөөгийн уур амьсгалыг илтгэсэн сонирхолтой сэдэв хэвээр байна.
Эх сурвалж:
• 360.ru
• news.ru
• rtvi.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.