БИЧЛЭГ: Венесуэлийн газар хөдлөлтийн нурангиас найм хоногийн дараа хүнийг эсэн мэнд аварлаа

Венесуэл улсад болсон хүчтэй газар хөдлөлтийн нуранги дороос найм хоногийн турш амьд байсан 43 настай хамгаалагч Эрнан Альберто Хил Флоресыг аврах багийнхан эсэн мэнд гаргаж авсан гайхамшигтай үйл явдал боллоо.

Тус улсын Ла Гуайра мужийн Катиа Ла Мар эргийн хотод байрлах "Galerias Playa Grande" худалдааны төвийн нуранги дороос түүнийг долоодугаар сарын 2-ны өдөр аварсан бөгөөд энэ нь зургаадугаар сарын 24-нд болсон гамшгаас хойш найм дахь хоног дээрээ тохиосон байна.

Гэр бүл, хоёр хүүхдийн хамт амьдардаг шөнийн ээлжийн хамгаалагч Хил Флорес газар хөдлөх үед ажлынхаа жижиг төмөр бүхээг дотор байжээ. Есөн давхар бетон барилга нурж унах үед уг төмөр бүхээг нь түүнийг 140 тонн жинтэй нурангид дарагдахаас хамгаалж, амьд үлдэх агаарын орон зайг үүсгэсэн байна. Тэрээр газар доор бараг есөн метрийн гүнд, нурсан зогсоолын ойролцоо түгжигдсэн байв.

Коста Рика улсын Улаан загалмайн нийгэмлэгийн нарийн мэргэжлийн баг гамшиг болсноос хойш дөрөв хоногийн дараа буюу зургаадугаар сарын 28-ны орчимд анх амьд хүний дохиог илрүүлж, хамгаалагчтай холбоо тогтоожээ. Гэвч түүнийг маш гүнээс шууд татаж гаргах боломжгүй байсан тул аврагчид дөрвөн өдрийн турш хоолой болон тариур ашиглан 10 гаруй литр ус, шингэн хоол, эм тариа болон хүчилтөрөгчийг доош дамжуулан амь насыг нь тэтгэсэн байна.

Нийт 70 гаруй цаг үргэлжилсэн, өдөр шөнөгүй явагдсан аврах ажиллагаанд Венесуэл, Чили, АНУ, Португал, Коста Рика, Сальвадор, Мексик гэсэн долоон орны мэргэжилтнүүд хамтран оролцлоо. Аврагчид нуранги улам нурахаас сэргийлж, маш болгоомжтойгоор хонгил ухсаар долоодугаар сарын 2-ны пүрэв гарагт Хил Флоресыг хүчилтөрөгчийн багтай, дамнуурга дээр гаргаж иржээ. Тэрээр ухаан саруул, биеийн байдал нь тогтвортой байсан бөгөөд эмнэлэг рүү хүргэгдэх явцдаа эмч нартай бүрэн ойлголцож байв. 

Сонирхолтой нь, тэрээр аврах ажиллагааны явцад амьд гарч чадахгүй байх вий гэхээс айж, өөрийг нь амьд байгааг эхнэр Гусбимар Гонзалест нь хэлэхгүй байхыг аврагчдаас эхэндээ хүсэж байжээ.

Венесуэлийн баруун хойд болон төв хэсэгт зургаадугаар сарын 24-ний өдөр 7.2 баллаас эхэлж, ердөө 39 секундын дараа 7.5 баллын хүчтэй газар хөдлөлт дараалан болсон юм. Энэ нь тус улсад 1900 оноос хойш тохиолдсон хамгийн хүчтэй газар хөдлөлтөд тооцогдож байна. Байгалийн гамшгийн улмаас амиа алдагсдын тоо 2300 дөхөж, 11200 гаруй хүн бэртэж, олон арван мянган хүн сураггүй болоод байгаа аж. Хил Флоресоос гадна өмнөх өдрүүдэд Ла Гуайра мужид зургаан хоногийн турш нурангид байсан гурван настай хүүхэд, Карабалледа хотод 106 цаг гацсан 21 настай Аарон Леви Кантильо Варгас болон нэгэн эцэг, хүү хоёрыг эсэн мэнд аварч чаджээ.

Хэдийгээр цаг хугацаа өнгөрөх тусам хүмүүсийг амьд олох итгэл буурч байгаа ч аврах багийнхан эрэн хайх ажиллагааг зогсолтгүй үргэлжлүүлсээр байна. Одоогийн байдлаар Бразилын хүмүүнлэгийн багийнхан Венесуэл болон Сальвадорын аврагчидтай хамтран Ла Гуайра мужийн нэгэн орон сууцны гаражид гацсан, амьд байгаа гэж таамаглаж буй хоёр иргэнийг аврахаар ажиллаж байна.