Дэлхийн спортын сэтгүүлчдийн өдрийг тэмдэглэж байна
Өнөөдөр буюу долоодугаар сарын 2-ны өдөр дэлхий даяар "Дэлхийн спортын сэтгүүлчдийн өдөр"-ийг албан ёсоор тэмдэглэж байна. Энэ өдрийг олон улсын хэмжээнд спортын салбарын үйл явдлыг шуурхай, үнэн зөв мэдээлж, үзэгч олондоо хүргэдэг сэтгүүлчдийн хөдөлмөр зүтгэлийг алдаршуулах зорилгоор жил бүр уламжлал болгон зохион байгуулдаг.
Олон улсын спортын сэтгүүлчдийн өдрийг анх 1995 оноос эхлэн дэлхий даяар тэмдэглэж ирсэн түүхтэй. Долоодугаар сарын 2-ны өдрийг тэмдэглэх болсон нь 1924 оны энэ өдөр Франц улсын Парис хотноо "Парис-1924" зуны Олимпын наадмын үеэр Олон улсын спортын хэвлэл мэдээллийн холбоо (AIPS) анх үүсгэн байгуулагдсантай холбоотой аж.
Тухайн үед Олимпын наадмын үеэр зургаан сэтгүүлч боксын рингэн дотор уулзаж, холбоо байгуулах санаачилгыг гаргаж байжээ. Үүний маргааш нь буюу 1924 оны долоодугаар сарын 2-ны өдөр дэлхийн 20 гаруй орны сэтгүүлчид цуглан Олон улсын спортын хэвлэл мэдээллийн холбоог албан ёсоор байгуулсан байна. Өдгөө тус холбоо нь цар хүрээгээ тэлж, дэлхийн 170 гаруй орны спортын сэтгүүлчдийг эгнээндээ нэгтгэсэн байгууллага болон хөгжжээ.
Спортын сэтгүүлчдийг салбарынхан болон уншигчид "үзэгтэй тамирчид" хэмээн нэрлэх нь байдаг. Энэхүү мэргэжил нь спортын нарийн мэдлэг, хурдан сэтгэх чадвар болон ялалт, ялагдлын хором бүрийг алдалгүй барьж авах сэтгэл зүйн өндөр тэвчээрийг шаарддаг онцлогтой. Тэд спортын талбарт өрнөж буй давтагдашгүй агшин, сэтгэл хөдөлгөсөн мөчүүдийг үзэгч, хөгжөөн дэмжигчдэд шууд хүргэх гүүр нь болж өгдөг байна.
Эх сурвалж:
• urug.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.