Их Британи хураан авсан Оросын газрын тосыг зарж Украинд туслахаар төлөвлөж байна
Их Британийн засгийн газар саатуулагдсан хөлөг онгоц (танкер)-оос хураан авсан Оросын "Urals" маркийн 98 мянга орчим тонн түүхий газрын тосыг худалдаж, олсон орлогыг нь Украинд цэргийн тусламж үзүүлэхэд бүрэн зарцуулахаар төлөвлөж байна.
Уг төлөвлөгөөний талаар 2026 оны зургаадугаар сарын 24-ний өдөр "The Telegraph" сонин мэдээлэв. Хураагдсан газрын тосны зах зээлийн үнэлгээ нь ойролцоогоор 35 сая фунт стерлинг бөгөөд Лондон хот уг ачааг дуудлага худалдаагаар борлуулах хууль эрх зүйн бүрэн боломжтой гэж үзэж байна.
Британийн албаны хүмүүсийн мэдэгдсэнээр, хөлөг онгоцыг саатуулсны дараа түүний тавцан дээрх газрын тос төрийн өмчид шилжсэн тул засгийн газар ачааг өөрийн үзэмжээр захиран зарцуулах хууль ёсны эрхтэй болжээ. Одоогоор хэлэлцүүлгийн шатанд байгаа уг төлөвлөгөөг хоёр хувилбараар хэрэгжүүлэхээр судалж байна.
Үүнд, олсон хөрөнгийг шууд Киев рүү шилжүүлэх, эсвэл Украины Зэвсэгт хүчинд зориулж цэргийн техник, тоног төхөөрөмж худалдан авахад зарцуулах хувилбарууд багтжээ. Харин Их Британийн Гэмт хэрэгтэй тэмцэх үндэсний агентлаг (NCA) мөрдөн шалгах ажиллагааг дуусгасны дараа хөлгийг Оросын талд буцаан олгохоор төлөвлөсөн байна.
Лондоны энэ алхам нь Оросын "сүүдрийн флот"-ын эсрэг хэрэгжүүлж буй хориг арга хэмжээг чангатгах чиглэлд хийж буй томоохон алхам болж байна. Ирэх долоодугаар сарын 16-нд болох шүүх хурал болон хураагдсан газрын тосыг дуудлага худалдаагаар худалдах эцсийн шийдвэр нь цаашид Оросын хөрөнгийг хураан авч Украинд тусламж болгон шилжүүлэх жишиг тогтоох эсэхийг олон улсын ажиглагчид анхааралтай ажиглаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.