Нигерийн парламентад нэр дэвшсэн одой эр 15 настай хүүхэд болох нь тогтоогджээ

Нигери улсад "30 настай, одой хүн" хэмээн өөрийгөө танилцуулж, парламентын сонгуульд нэр дэвшсэн хүн нь үнэн хэрэгтээ 15 настай өсвөр насны хүүхэд болох нь илчлэгджээ.

Энэхүү дуулиант хэргийн эзэн луйвар хийсэн нь батлагдсан учир нэр дэвшигчийн жагсаалтаар нэрийг нь хасжээ. 

Уг өсвөр насны хүүг Махмуд Садис Буба (эсвэл Махмуд Садис Баба) гэдэг бөгөөд олон нийтийн дунд "Абин Ал-Абин Жажау" буюу "Зариагийн гайхамшиг" гэх хочоороо алдаршжээ.

Тэрээр найман настай хүүхэд шиг харагддаг, жижиг биетэй, хүүхэд шиг царайтай байдлаа ашиглан улс даяар олны анхаарлыг татаж чадсан байна. Махмуд өөрийн биеийн онцлогоос огтхон ч ичдэггүй, одой өвчтэй 30 настай насанд хүрсэн эрэгтэй хэмээн худал мэдээлэл тарааж, хүмүүсийн итгэлийг олж авчээ.

Олон нийтийн сүлжээнд тархсан сонгон шалгаруулалтын бичлэгт тэрээр дунд сургуулийн гэрчилгээтэй бөгөөд өмнө нь жолоочоор ажиллаж байсан гэж ярьсан байна. Түүгээр ч зогсохгүй өөрийн сонгуулийн кампанит ажлыг ард түмний төлөөх амин хувиа хичээгээгүй үйл хэрэг хэмээн тодорхойлж, намын гишүүддээ "Энэ бол миний тухай биш, ард түмний нэрийн өмнөөс хийж буй ажил" хэмээн уран цэцэн үгс хэлж байжээ. Энэхүү зохиомол түүхдээ тулгуурлан тэрээр Нигерийн Үндэсний Ассамблейд (парламент) "Бүх дэвшилтэт конгресс" (APC) намаас нэр дэвших эрхээ авахаар өрсөлдөж байв.

Эхэндээ түүнийг улс төрийн хүртээмжтэй байдлыг илтгэсэн, урам зориг өгсөн гайхалтай дүр хэмээн олон нийт сайшаан хүлээж авсан юм. Гэвч түүний жинхэнэ нас буюу 15 настай болох нь илчлэгдсэнээр энэхүү кампанит ажил тэр даруй үндэсний хэмжээний томоохон дуулиан болон хувирчээ. 

Эх сурвалж:

• interntv.ru

• english.ratopati.com