ОХУ Киев рүү "системтэй цохилт" өгөхөө анхааруулав
ОХУ-ын Гадаад хэргийн яамнаас Украины нийслэл Киев хотын батлан хамгаалах аж үйлдвэрийн газрууд болон шийдвэр гаргах төвүүдийн эсрэг "системтэй цохилт" өгөхөө албан ёсоор мэдэгдлээ.
Энэхүү ажиллагаатай холбогдуулан Москвагийн зүгээс Киевт байгаа гадаадын иргэд, дипломат төлөөлөгчид болон олон улсын байгууллагын ажилтнуудыг хотыг яаралтай орхин гарахыг анхааруулсан байна.
Оросын Гадаад хэргийн сайд Сергей Лавров АНУ-ын Төрийн нарийн бичгийн дарга Марко Рубиотой утсаар ярих үеэрээ дээрх аюулын талаар шууд анхааруулж, дипломат ажилтнууд болон иргэдээ нүүлгэн шилжүүлэхийг зөвлөжээ. Мөн нутгийн энгийн иргэдийг засаг захиргаа, цэргийн зориулалттай барилга байгууламжаас хол байхыг хатуу сануулсан байна.
Энэхүү сүрдүүлгийн өмнөх амралтын өдрүүдэд Оросын зэвсэгт хүчин Киев рүү 600 орчим нисгэгчгүй нисдэг тэрэг, 90 пуужин харвасан нь дайн эхэлснээс хойших хамгийн том халдлагуудын нэг болсон юм. Уг цохилтын үеэр цөмийн цэнэг тээвэрлэх чадвартай, олон хошуутай "Орешник" хэт авианы баллистик пуужинг ашигласан бөгөөд энэ нь дөрвөн жил гаруй үргэлжилж буй мөргөлдөөний түүхэнд уг зэвсгийг хэрэглэсэн гурав дахь тохиолдол болжээ. Халдлагын улмаас нийслэл болон орчмын бүс нутагт дор хаяж 4 хүн амь үрэгдэж, 80-100 хүн шархадсан байна.
Москвагийн зүгээс эдгээр цохилтыг Украины армийн үйлдлийн эсрэг хариу арга хэмжээ гэж тайлбарлаж байна.
Тодруулбал, Луганск мужийн Старобилск хотын оюутны дотуур байр руу Украины дронууд халдаж, 21 хүний аминд хүрсэн гэж Оросын тал буруутгасан юм. Харин Украины цэргийнхэн энгийн иргэдийг онилоогүйгээ мэдэгдэж, тухайн бүсэд байрлаж байсан Оросын цэргийн нисгэгчгүй нисдэг тэрэгний удирдлагын элит нэгжид амжилттай цохилт өгсөн хэмээн няцаажээ.
Олон улсын хамтын нийгэмлэг болон Украины эрх баригчид Оросын сүрдүүлэгт автахгүй байхыг уриалж байна.
Украины Гадаад хэргийн сайд Андрей Сибига үүнийг сэтгэл зүйн шантааж хэмээн тодорхойлсон бол, Киев дэх Европын Холбооны төлөөлөгчийн газрын тэргүүн Катарина Матернова дипломат төлөөлөгчийн газрууд үйл ажиллагаагаа хумих төлөвлөгөөгүй бөгөөд Оросыг зориудаар айдас түгээхийг оролдож байна хэмээн буруутгалаа.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.