7 Eleven Японы сүлжээ дэлгүүрийг үндэслэн байгуулагч таалал төгсжээ
Японы "конвиниенс дэлгүүрийн эцэг" хэмээн алдаршсан Тошифүми Сүзүки 93 насандаа Токио дахь гэртээ зүрхний дутагдлын улмаас таалал төгсжээ.
Түүнийг тавдугаар сарын 18-нд өөд болсон талаар "Seven & i Holdings" компани даваа гарагт албан ёсоор мэдэгдэж, гэр бүлийнхний хүрээнд оршуулгын ёслол үйлдэж байгааг мэдээлсэн байна.
Тэрээр 1932 онд Нагано мужид төрсөн бөгөөд 1956 онд Чүо их сургуулийг төгсжээ.
Улмаар 1963 онд супермаркетийн сүлжээ болох "Ito-Yokado" компанид ажилд орсон байна. 1970-аад онд АНУ-д аялах үеэрээ "7-Eleven" дэлгүүрийн үзэл баримтлалтай танилцаж, түүнийг эх орондоо нэвтрүүлэхээр шийджээ. Тухайн үед удирдлагууд болон зөвлөхүүд уг загварыг орон нутгийн жижиг дэлгүүрүүдтэй өрсөлдөж чадахгүй хэмээн эргэлзэж байсан ч тэрээр 1973 онд АНУ-ын "Southland Corp" компанитай лицензийн гэрээ байгуулж, дараа жил нь Токио хотноо анхны салбараа нээсэн түүхтэй.
Тошифүми Сүзүкигийн удирдлага дор "7-Eleven" сүлжээ жижиглэн худалдааны түүхэн дэх хамгийн амжилттай өөрчлөлтүүдийн нэгийг хийсэн юм. 1990 онд АНУ-ын толгой компани болох "Southland Corp" асар их өрийн улмаас дампуурлаа зарлахад тэрээр Японы компанийн охин компани болгон өөрчилжээ.
2005 онд "Seven & i Holdings"-ийг үүсгэн байгуулж, банкны үйлчилгээ болон бусад их дэлгүүрүүдийг нэгтгэсэн томоохон корпораци болгон өргөжүүлсэн байна. Түүнийг 2016 онд гүйцэтгэх захирлын албан тушаалаа өгөх үед тус брэнд дэлхий даяар 85 мянга гаруй, зөвхөн Японд 21 мянга гаруй салбартай дэлхийн хэмжээний эзэнт гүрэн болон тэлсэн байв.
Түүний хамгийн том гавьяа бол орчин үеийн "конбини" буюу хялбар үйлчилгээтэй дэлгүүрийн соёлыг үндсээр нь өөрчилсөн явдал юм.
Тэрээр зөвхөн Америк хэв маягийн бүтээгдэхүүн худалдаалахын оронд онигири буюу будааны бөмбөлөг зарах санаачилга гаргасан нь өдгөө жилд 2 тэрбум гаруй ширхэг борлуулагддаг гол бүтээгдэхүүн болжээ. Мөн хэрэглэгчдийн сонирхолд нийцүүлэн бараа материалыг бүрдүүлэхэд өгөгдлийн аналитикийг анхлан нэвтрүүлж, 24 цагийн үйл ажиллагаатай болгосон байна.
Өнөөдөр эдгээр дэлгүүрүүд нь зөвхөн хүнс худалдаалахаас гадна АТМ, төлбөр тооцоо, бичиг баримт хувилах, гамшгийн үед хариу арга хэмжээ авах зэрэг өдөр тутмын амьдралын салшгүй нэг хэсэг болон хувирчээ. "Seven & i Holdings" компани түүний амьдралынхаа туршид үзүүлсэн дэмжлэг, хичээл зүтгэлд гүн талархал илэрхийлсэн бөгөөд олон нийтэд зориулсан салах ёс гүйцэтгэх арга хэмжээний товыг хожим зарлах ажээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.