АНАЛИЗ: ОХУ-ын цэргийн сулрал геополитикийн нөхцөл байдлыг өөрчиллөө

Украины дайны одоогийн нөхцөл байдлын талаар CNN.com-д нийтлэгдсэн нэгэн анализ өгүүллийг та бүхэнд хүргэе. 

Олон улсын шинжээчдийн тайлангаар ОХУ 2024 оны наймдугаар сараас хойш анх удаа Украинд газар нутгаа алдаж, цэрэг болон эдийн засгийн хувьд хүнд байдалд орсон байна. Энэхүү сулрал нь Владимир Путины БНХАУ-тай харилцах харилцаанд өөрчлөлт оруулж, дотоодын улс төрийн тогтворгүй байдлыг улам хурцатгажээ.

Оросын арми фронт дээр ухарч эхэлсэн бөгөөд өнгөрсөн сард мэдэгдэхүйц хэмжээний газар нутгаа алдсан байна. Үүний зэрэгцээ, В.Путиныг Бээжинд айлчлахаас хэдхэн хоногийн өмнө Украинчууд Москва хот руу 500 гаруй нисгэгчгүй нисдэг тэргээр довтолсон нь сүүлийн нэг жилийн хугацаан дахь хамгийн том цохилт болжээ.

Гэсэн хэдий ч Европын тагнуулын байгууллагын мэдээлснээр, Оросын удирдагч бууж өгөх бодолгүй байгаа бөгөөд Киевт өөртөө ашигтай засгийн газар байгуулахын тулд өөр арга замуудыг эрэлхийлж, ирэх өвлийг украинчуудын хувьд илүү хүндрүүлэхээр төлөвлөж байна.

2026 оны тавдугаар сарын 20-нд В.Путин БНХАУ-ын дарга Ши Жиньпинтэй уулзаж, 2001 оны "Сайн хөршийн болон найрсаг хамтын ажиллагааны гэрээ"-ний 25 жилийн ойг тэмдэглэв.

Гэвч шинжээчдийн үзэж буйгаар, Оросын тэргүүн өмнөх айлчлалаасаа хамаагүй сул дорой байдалтайгаар Бээжинд очсон байна. Ши Жиньпин Оросын энэхүү хүндрэл болон эдийн засгийн хамаарлыг анзаарсан бөгөөд Ойрхи Дорнодын мөргөлдөөнөөс үүдэлтэй газрын тосны нийлүүлэлтийн асуудлаа шийдвэрлэхийн тулд эрчим хүчний салбарт өөрт ашигтай гэрээ байгуулахыг шаардаж эхэлжээ.

Хэдийгээр хүчний тэнцвэргүй байдал үүссэн ч хоёр удирдагч АНУ-ыг дэлхийн цорын ганц хэт гүрэн байх цаг үе дууссан хэмээн мэдэгдэж, олон улсын харилцааны шинэ чиг хандлагыг тодорхойлохыг оролдсон байна.

Гадаад харилцаанаас гадна Оросын дотоод нөхцөл байдал маш хурцадмал болж байна.

Европын тагнуулын мэдээллээр Москвад төрийн эргэлт гарч болзошгүй гэх цуурхал тархаж, В.Путины аюулгүй байдлын хамгаалалтыг эрс чангатгажээ. Түүнчлэн, фронтоос буцаж ирсэн цэргүүд нийгэмд хүчирхийлэл, гэмт хэрэг үйлдэх нь ихэссэн бөгөөд зарим нь зохион байгуулалттай гэмт бүлэглэлд нэгдэж байна. Стратеги, олон улсын судалгааны төв (CSIS)-ийн тооцоолсноор дайнаас буцаж ирсэн цэргүүд Оросын дотоодод 1000 гаруй хүний амь насыг хөнөөж, гэмтээсэн ноцтой баримт бүртгэгджээ.

Хатуу чанга аюулгүй байдлын албад одоогоор эсэргүүцлийн хөдөлгөөнийг дарж байгаа ч Оросын төрийн тогтолцоо дотроосоо маш ихээр хөндийрч, ямар нэгэн өдөөгч хүчин зүйл гарвал маш хурдан нуран унах эрсдэлтэйг Европын тагнуулын байгууллага анхааруулж байна. Цаг хугацаа Оросын талд ажиллахгүй байгаа бөгөөд Ши Жиньпин энэхүү сул талыг аль хэдийнэ ашиглаж эхэлсэн шиг барууны улс төрчид ч мөн ОХУ-ын Украинд хүлээж буй ялагдлыг бодитоор үнэлж, дараагийн алхмуудаа төлөвлөх шаардлагатай болж байна.