ОХУ, Киев хот руу пуужин болон дроноор томоохон цохилт өгчээ
ОХУ-ын зэвсэгт хүчин ням гарагт Украины нийслэл Киев болон ойр орчмын бүс нутаг руу сүүлийн жилүүдэд гарч байгаагүй хамгийн том буюу 600 орчим дрон, 90 пуужингаар нүсэр цохилт өгчээ.
Энэхүү цохилтын улмаас дор хаяж дөрвөн хүн амь үрэгдэж, 80-аас 100 орчим хүн шархадсан бөгөөд иргэний болон дипломат байгууламжууд ихээхэн хохирол амсаад байна.
Уг халдлагад Оросын тал цөмийн цэнэгт хошуу тээвэрлэх чадвартай, дуунаас хэт хурдан "Орешник" баллистик пуужинг ашигласан нь дөрвөн жил үргэлжилж буй дайны хугацаанд уг зэвсгийг хэрэглэсэн гурав дахь тохиолдол боллоо. ОХУ-ын Батлан хамгаалах яамнаас "Орешник"-ээс гадна Искандер, Кинжал, Циркон зэрэг пуужингуудыг ашигласнаа баталсан байна. Украины Агаарын довтолгооноос хамгаалах хүчин 549 дрон, 55 пуужинг амжилттай устгаж, саатуулсан бол өөр 19 пуужин байндаа хүрч чадаагүйг мэдээлэв.
Хүчтэй бөмбөгдөлт болон унасан пуужингийн хэлтэрхийнүүд нийслэл хотын даяар олон арван орон сууц, засгийн газрын байр, сургууль, усан хангамжийн байгууламжийг сүйтгэж, орон нутгийн зах шатжээ. Түүнчлэн "Орешник" пуужин Киевийн бүс дэх Белая Церковь хотод туссан байна. Халдлагын үеэр Албани улсаас Украинд суугаа Элчин сайдын өргөө өртсөнөөс гадна Дэлхийн Эрүүл Мэндийн Байгууллага болон НҮБ-ын хэд хэдэн агентлагийн байрладаг барилгын цонхнууд хагарч гэмтжээ.
Кремлийн зүгээс энэхүү нүсэр цохилтыг Украины цэргийн удирдлага, хяналтын байгууламж, нисэх хүчний бааз, цэрэг-аж үйлдвэрийн газруудад чиглэсэн амжилттай ажиллагаа хэмээн мэдэгдэв. ОХУ-ын Ерөнхийлөгч Владимир Путин үүнийг Оросын эзэмшилд байгаа зүүн Украины нутаг дахь оюутны дотуур байр руу дрон илгээж, 21 хүний аминд хүрсэн Украины үйлдлийн эсрэг хариу арга хэмжээ хэмээн тайлбарласан байна.
Олон улсын хамтын нийгэмлэг болон Украины удирдлагууд уг үйл явдлыг эрс буруушааж байна.
Украины Ерөнхийлөгч Владимир Зеленский халдлага үйлдэгчдийг "үнэхээр ухаан мэдрэлгүй" хэмээн шүүмжилсэн бол Албанийн Гадаад хэргийн сайд Ферит Хожа Элчин сайдын өргөө рүү хийсэн халдлагыг "хүлээн зөвшөөршгүй", "ноцтой хурцадмал байдал" гэж тодорхойлов. НҮБ-ын өндөр албан тушаалтан энгийн иргэдийг асар их эрсдэлд оруулж буйг буруушааж, энэхүү тасралтгүй хүчирхийллийг нэн даруй зогсоохыг уриаллаа.
Эх сурвалж:
• klcc.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.