Samsung-ийн үнэлгээ 1 их наяд долларт хүрч, ажил хаялтыг зогсоов
Өмнөд Солонгосын "Samsung Electronics" компани хиймэл оюун ухааны чипийн эрэлт нэмэгдсэнтэй холбоотойгоор зах зээлийн үнэлгээ нь 1 их наяд ам.долларт хүрсэн түүхэн амжилт үзүүллээ.
Энэхүү санхүүгийн өсөлтийн дараа тус компанийн 48,000 орчим ажилчин ашиг орлогыг шударгаар хуваарилахыг шаардаж, түүхэн дэх хамгийн том ажил хаялтыг зарлаад байсан ч талууд цалин хөлсний урьдчилсан тохиролцоонд хүрснээр зогсжээ.
Дэлхий даяар хиймэл оюун ухааны технологи эрчимтэй хөгжиж, хагас дамжуулагчийн хомстол үүссэн нь тус компанийн хувьцааны үнийг энэ онд хоёр дахин өсгөх гол шалтгаан болжээ. "Samsung" нь дэлхийн хиймэл оюун ухааны нийлүүлэлтийн сүлжээний төвд байрлаж байгаа бөгөөд 2026 оны тавдугаар сарын байдлаар "TSMC"-ийн дараа 1 их наяд долларын босгыг давсан Азийн хоёр дахь компани болж бүртгэгдсэн байна.
Компанийн ашиг орлого огцом өссөн хэдий ч баялгийн дотоод хуваарилалтаас үүдэн маргаан дэгдсэн юм. Удирдлагуудын зүгээс өндөр ашигтай ажилласан санах ойн чипийн багийнханд жилийн цалинг 607 хувиар бодож урамшуулал олгохыг санал болгосон бол алдагдалтай ажиллаж буй бусад хэлтсийн ажилтнуудад ердөө 50-100 хувийн урамшуулал амласан байна. Үүнийг үйлдвэрчний эвлэл эсэргүүцэж, өрсөлдөгч "SK Hynix" компани үйл ажиллагааны ашгийнхаа 10 хувийг ажилчидтайгаа хуваалцдаг жишгийг дурдаад, урамшууллын дээд хязгаарыг цуцлахыг шаарджээ.
Өмнөд Солонгос дахь нийт ажиллах хүчний 40 орчим хувийг бүрдүүлдэг үйлдвэрчний эвлэлийн гишүүд 2026 оны тавдугаар сарын 21-нээс эхлэн 18 хоногийн турш ажил хаяхаар төлөвлөөд байв.
Хэрэв энэхүү зогсолт хэрэгжсэн бол компанийн 2026 оны үйл ажиллагааны ашгийг 5 хувиар бууруулж, дэлхийн хиймэл оюун ухааны нийлүүлэлтийн сүлжээг тасалдуулах эрсдэлтэйг шинжээчид анхааруулсан. Гэвч ажил хаялт эхлэхээс хэдхэн цагийн өмнө талууд хагас дамжуулагчийн ашгаас 12 хувийн урамшуулал олгох нөхцөлөөр урьдчилсан гэрээ байгуулж чадсан байна.
Энэхүү тохиролцоо нь дэлхийн санах ойн чипийн хомстолд санаа зовниж байсан хөрөнгө оруулагчдад тайвшрал авчирчээ. Ажил хаялтыг зогсоох шийдвэр гарсны дараа "Samsung"-ийн хувьцааны ханш 8.5 хувиар өсөж, дээд амжилт тогтоосон нь Өмнөд Солонгосын хөрөнгийн зах зээлийн ерөнхий өсөлтөд хүчтэй түлхэц үзүүлэв. Хэдийгээр хямралыг түр хугацаанд намжаасан ч үйлдвэрчний эвлэлийн гишүүд уг гэрээг албан ёсоор батлах эсэхээ санал хураалтаар шийдвэрлэх үлдээд байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.