Эверестийн оргилд нэг өдөрт 274 хүн гарч, дээд амжилт тогтоов
Балбын талаас Эверестийн оргилд 274 уулчин нэг өдрийн дотор (2026 оны 5-р сарын 20-нд) амжилттай гарч, түүхэн дээд амжилт тогтоолоо.
Балбын Уулчдын холбооны ерөнхий нарийн бичгийн дарга Риши Рам Бхандаригийн мэдэгдсэнээр, зарим уулчид баримт нотолгоогоо хараахан бүрдүүлж өгөөгүй байгаа тул энэ тоо цаашид ч өсөх магадлалтай байгаа аж.
Өмнөх дээд амжилт нь 2019 онд 223 уулчин нэг өдөр оргилд хүрсэн явдал байв. Энэ жилийн хувьд цаг агаарын таагүй байдал болон мөсөн уул нурах эрсдэлээс шалтгаалан авиралтын улирал оройтож эхэлсэн юм. Түүнчлэн Хятадын эрх баригчид Төвөдийн талаас буюу хойд чиглэлээр авирах зөвшөөрөл олгоогүй тул бүх уулчид зөвхөн Балбын талд төвлөрсөн нь ийнхүү нэг өдөр олноороо оргилд хүрэх гол шалтгаан болжээ.
Нийт 274 уулчны дийлэнх нь нэмэлт хүчилтөрөгч болон шерпа хөтөчдийн тусламжтайгаар оргилд хүрсэн бол Эквадорын уулчин Марсело Сеговиа ямар нэгэн нэмэлт хүчилтөрөгчгүйгээр, бие даан авирсан нь онцгойлон үзэх үйл явдал боллоо. Мөн энэ өдөр уулын спортын ахмад тамирчин Ками Рита Шерпа 32 дахь удаагаа, Пасанг Дава Шерпа 30 дахь удаагаа оргилд гарч өөрсдийн амжилтаа ахиулсан бол Лакпа Шерпа 11 дэх удаагаа оргилд хүрснээр эмэгтэй уулчдын дээд амжилтыг үргэлжлүүлэн эзэмшиж байна.
Энэхүү түүхэн үйл явдал нь уулчдын аюулгүй байдалтай холбоотой шүүмжлэлийг дахин сэдрээлээ.
Энэ улиралд Балбын засгийн газар тус бүр нь 15,000 ам.долларын үнэтэй 494 авирах зөвшөөрөл олгосон байна. Хэт олон хүн нэгэн зэрэг авирах нь хүчилтөрөгчийн дутагдалтай үхлийн бүсэд түгжрэл үүсгэж, уулчдын амь насанд ноцтой эрсдэл учруулдаг болохыг мэргэжилтнүүд хатуу анхааруулсаар байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.