Украин Оросын цэргийн байгууламжуудад цохилт өгч их хэмжээний хохирол учруулав
Украины зэвсэгт хүчин эзлэгдсэн бүс нутгууд дахь Оросын цэргийн хоёр өөр байгууламжид цохилт өгч, их хэмжээний хохирол учруулснаа мэдэгдлээ.
Эдгээр ажиллагаа нь Москвагийн цэргийн дэд бүтэц, үйл ажиллагааны гол төвүүдийг чиглэсэн дунд тусгалын нисгэгчгүй нисдэг тэрэгний халдлагыг эрчимжүүлж буй үед болж байна.
Эхний цохилтыг лхагва гаргийн шөнө Донецк мужийн зүүн хэсэгт орших эзлэгдсэн Снежное хот дахь Оросын нисгэгчгүй нисдэг тэрэгний нисгэгчдийг бэлтгэх сургалтын баазад өгсөн байна. Украины Нисгэгчгүй системийн хүчний командлагчийн олон нийтэд мэдээлснээр, уг халдлагын улмаас Оросын 65 сонсогч, нэг сургагч багш амь үрэгдсэн нь батлагджээ.
Үүний дараахан буюу пүрэв гарагт Херсон мужид дараагийн томоохон халдлагыг зохион байгуулжээ.
Украины Ерөнхийлөгч Владимир Зеленскийн мэдэгдсэнээр, Оросын Холбооны Аюулгүй Байдлын Албаны төв байр болон ойролцоох агаарын довтолгооноос хамгаалах системд чиглэсэн хоёр дахь давлагааны үеэр Оросын 100 орчим цэргийн албан хаагч амь үрэгдэж, шархадсан байна. Гэхдээ олон улсын томоохон хэвлэл мэдээллийн байгууллагууд дайтагч талуудын мэдээлсэн хохирлын тоо баримтыг хөндлөнгөөс баталгаажуулах боломжгүй байгааг онцолжээ.
Эдгээр үйл явдалтай зэрэгцэн ОХУ-ын зүгээс хариу арга хэмжээ авч, пүрэв гарагт шилжих шөнө Украины нутаг дэвсгэрт цохилт өгсний улмаас таван энгийн иргэн амиа алдаж, 41 хүн шархадсан талаар Украины эрх баригчид мэдээлэв. Түүнчлэн хурцадмал байдал даамжирч буй энэ үед ОХУ-ын Ерөнхийлөгч Владимир Путин, Беларусийн Ерөнхийлөгч Александр Лукашенко нар цахим хэлбэрээр холбогдож, цөмийн зэвсгийн хамтарсан сургуулилтыг удирдсан нь нөхцөл байдлыг улам хүндрүүлж байна.
Өнгөрсөн сард Украины зэвсэгт хүчин Оросын эзлэн авснаас илүү газар нутгийг буцаан хяналтдаа оруулж чадсан хэдий ч 2026 оны тавдугаар сарын байдлаар Москва тус улсын газар нутгийн 20 орчим хувийг хянасан хэвээр байна. Цаашид Киев алсын болон дунд тусгалын цохилтоо улам эрчимжүүлэх төлөвтэй байгаа нь дайны фронт дахь хүчний харьцаанд чухал нөлөө үзүүлж болзошгүй юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.