Knowmadic Arts Lab зургаадугаар сард зохион байгуулагдана

Knowmadic Arts Lab нь нүүдлийн соёл иргэншлийн гүн ухааныг түгээн дэлгэрүүлэх, залууст нүүдлийн мал аж ахуйтай биечлэн танилцах боломж олгох зорилготой хөтөлбөр юм.

Тус хөтөлбөр анх 2025 оны наймдугаар сард Говьсүмбэр аймагт зохион байгуулагдаж, Монгол Улсын өнцөг булан бүрээс шалгарсан өөр өөрийн өвөрмөц онцлог, үзэл бодолтой 12 оюутан залуу хамрагджээ.

Хөтөлбөрийн үеэр оролцогчид Харвард, Стэнфордын их сургуулийн профессорууд, Монголын судлаачид болон уран бүтээлчидтэй хамтран хүн, байгаль, нийгмийн харилцаа, дэлхийн тогтолцооны талаар судалж, шинэ өнцгөөс сэтгэн эргэцүүлэх боломжийг олж авчээ.

Энэ жилийн зуны хөтөлбөр Хэнтий аймгийн Дэлгэрхаан суманд, хангай ба тал хээрийн байгалийн өвөрмөц зохицол бүрдсэн түүхэн бүс нутагт зохион байгуулагдана. Нутгийн малчин иргэдийн оролцоотой хэрэгжих энэхүү хөтөлбөр нийт долоон хоног үргэлжилнэ. Хөтөлбөрт 18-25 насны залуус хамрагдах боломжтой бөгөөд оролцох хүсэлтэй залуусын өргөдлийг энэ сарын 22-ныг хүртэл хүлээн авна. Тодруулбал, хөтөлбөрийн эхний хэсэг зургаадугаар сарын 13-14-нд Улаанбаатар хотод, үндсэн хөтөлбөр зургаадугаар сарын 15-19-ний өдрүүдэд Хэнтий аймгийн Дэлгэрхаан суманд болно.