🔴 Х.Нямбаатар: Н.Учрал дүүд хэлэхэд, эхлээд ажил хийж сур, поп шийдвэрүүдээ дараа нь гарга

Нийслэлийн Засаг дарга бөгөөд Улаанбаатар хотын захирагч Х.Нямбаатар өөрийг нь албан тушаалаас нь огцруулах шийдвэр гарсантай холбогдуулан олон нийтэд хандаж мэдээлэл хийлээ. Тэрбээр энэхүү шийдвэрийг улс төрийн зорилготой ядмагхан үйлдэл гэж үзэж байгаагаа хэлж, Засгийн газар болон сайд Н.Учрал руу хандан хатуу шүүмжлэл хэллээ. 

Хотын даргыг огцруулах үндэслэлд махны үнийг өсгөж, инфляцыг нэмэгдүүлсэн, 2500 тонн нөөцийн мах алга болсон гэх асуудлыг дурдсаныг тэрбээр эрс үгүйсгэлээ. Инфляц болон шатахууны нийлүүлэлтийн хомсдолоос үүдэлтэй махны үнийн өсөлтийг Эдийн засаг, хөгжлийн сайдаар ажиллаж байсан Н.Учралын буруутай үйл ажиллагаатай холбоотой гэлээ. Мөн нөөцийн махыг хувийн аж ахуйн нэгжүүд татаас авч, и-баримтаар борлуулдаг бөгөөд үүнд хотын дарга хамааралгүй болохыг онцолсон юм.

Ерөнхий сайдын өгсөн чиглэлийн дагуу Улаанбаатар хотод хэрэгжиж буй метро, трамвай, тойрог болон Туулын хурдны зам зэрэг томоохон төсөл, хөтөлбөрүүдийг зогсоох шийдвэр гаргасныг хэллээ. Ялангуяа ирэх оны долоодугаар сард ашиглалтад орох байсан Туулын хурдны замын төслийг зогсоосноор олон улсын шүүхийн маргаан үүсэж, хохирлыг нь хожим шийдвэр гаргасан хүмүүс хариуцах болно гэдгийг анхааруулав.

Мэдэгдлийг видео хэлбэрээр үзэхийг хүсвэл ЭНД дарна уу

Өнгөрсөн хугацаанд хийж хэрэгжүүлсэн ажлуудаа тэрбээр тайлагналаа. Нийслэлийн агаарын бохирдлыг 30 гаруй хувиар, авто замын түгжрэлийг 11 хувиар бууруулж, нийтийн тээврийн парк шинэчлэлийг бүрэн хийж, Сэлбэ дэд төвийн 160 га газрыг чөлөөлөн орон сууцжуулах ажлыг 35 хувьтай үргэлжлүүлж байгаа. Өнөөдрийн байдлаар нийслэлийн дансанд арилжааны банкуудад 1.5 их наяд, Төрийн санд 700 тэрбум төгрөг хадгалагдаж байгаа бөгөөд хотын санхүүгийн байдал тогтвортой, орлого арвижиж байгааг хэллээ.

Олон нийтийн сүлжээгээр шүүмжлэл дагуулсан замын хашлага буюу бордюрын асуудлыг зохион байгуулалттай хар пи-ар гэж үзэж байна. Өнгөрөгч долоо хоногоос эхэлсэн энэхүү хар пи-арыг Ерөнхий сайд Н.Учралын баг хийж байгааг мөн хэллээ. Зам засварын ажлын хүрээнд 50-100 жилийн насжилттай боржин чулуун хашлагаар сольж байгаа бөгөөд тендерийн ямар нэгэн хулгай байхгүй, Үндэсний аудитын газраас ямар ч зөрчилгүй гэсэн дүгнэлт гаргасан. Мөн Туулын хурдны замын гүйцэтгэгч компанийн гүйлгээг хууль хяналтын байгууллага шалгаж, хууль ёсны болохыг тогтоосон гэдгийг хэллээ. 

Төгсгөлд тэрбээр улс орны эдийн засгийн нөхцөл байдал хүндэрч, Тогтворжуулалтын сан хоосорч, төсвийн орлого тасалдсан тул үүнийгээ далдлахын тулд төсвийн тодотгол хийх нэрийдлээр өөрийг нь огцруулж байна хэмээн хардаж байгаагаа хэллээ. Мөн хууль хяналтын байгууллагыг ашиглан өөрийг нь болон баг хамт олныг нь шалгах даалгавар өгсөн ч үүнээс айж шантрахгүй бөгөөд цаашид хууль, эрх зүйт төрийн төлөө эцсээ хүртэл тэмцэнэ гэдгээ хатуу мэдэгдлээ.