The HU хамтлаг Хойд Америк дахь аялан тоглолтоо эхлүүллээ

“The HU” хамтлаг Финландын алдарт метал-челло “Apocalyptica” хамтлагтай хамтарсан Хойд Америк дахь ээлжит аялан тоглолтоо АНУ-ын Мэрилэнд мужийн Сильвер Спринг хотоос албан ёсоор эхлүүллээ.

Ко-хэдлайнер тоглолт нь хоёр хамтлагийн хувьд онцгой ач холбогдолтой бөгөөд эхний зогсоол болох “The Fillmore Silver Spring” цэнгэлдэхэд тоглолт эхэлсэн байна. 

Уг аялал нь 2026 оны зургаадугаар сарын 7-ны өдрийг хүртэл үргэлжлэх бөгөөд Калифорни мужийн Анахайм хотын “House of Blues”-д өндөрлөх хуваарьтай байна. Уран бүтээлчид Хойд Америкийн томоохон хотуудаар нийт 18 удаа тайзнаа гарах юм. Тоглолтын бүх өдрүүдэд Финландын алдарт рок хөгжмийн төлөөлөл “The Rasmus” хамтлаг тусгай зочноор уригдан оролцож, нээлтийн үзүүлбэрүүдийг үзүүлэх юм. 

Аялан тоглолтын хөтөлбөрт саяхан олны хүртээл болсон “The Real You” хэмээх шинэ сингл багтсан нь сонсогчдын анхаарлыг ихээхэн татаж байна. Хамтлагийн гишүүн Тэмка буюу Н.Тэмүүлэнгийн онцолсноор, дээрх бүтээл нь удахгүй худалдаанд гарах “The Hun” нэртэй гурав дахь бие даасан цомгийн ерөнхий өнгө төрх, хөгжмийн хэмнэлийг тодорхойлж байгаа аж. Шинэ цомог нь тэдний 2022 онд гаргасан “Rumble of Thunder” цомгоос хойшхи анхны бүрэн хэмжээний студийн бүтээл болох юм.

Уран бүтээлчид энэ оны зун болон намрын хуваариа хэдийнэ зарласан бөгөөд наймдугаар сарын 20-ноос эхлэн рок хөгжмийн одод болох Роб Зомби, Мэрилин Мэнсон нарын “Freaks on Parade” аялан тоглолтод нэгдэнэ. Түүнчлэн долоодугаар сарын 11-нд Их Британид домогт “Iron Maiden” хамтлагийн “Run For Your Lives” тоглолтын нээлтийг хийх бол 9-10 дугаар сард Европ тивийг хамарсан бие даасан аяллаа үргэлжлүүлэхээр төлөвлөжээ.

Одоогийн байдлаар эхний тоглолтуудын тасалбар болон уран бүтээлчидтэй биечлэн уулзах эрх бүхий VIP багцууд бүрэн борлуулагдаж дууссан талаар зохион байгуулагч “Live Nation” компаниас мэдээлсэн байна.