Нацистуудын хулгайлсан уран зураг СС-ийн генералын үр удамд хадгалагдаж байжээ
Дэлхийн хоёрдугаар дайны үед нацистуудын хулгайлсан уран зураг Нидерландын СС-ийн өндөр албан тушаалтан Хендрик Сейффардтын үр удмын гэрээс саяхан олджээ.
Урлагийн алдартай мөрдөгч Артур Бранд уг хэргийг олон нийтэд дэлгэж, "өөрийн карьер дахь хамгийн хачирхалтай тохиолдол" хэмээн тодорхойлсон байна.
Уг бүтээл нь Нидерландын зураач Тоон Келдерийн зурсан "Залуу охины хөрөг" бөгөөд анх еврей гаралтай урлагийн бүтээлийн худалдаачин Жак Гудстиккерийн алдартай цуглуулгад багтаж байжээ. 1940 онд нацистууд Нидерланд руу довтлох үед Жак Гудстиккер Англи руу дүрвэж яваад амь үрэгдсэн бөгөөд түүний асар том цуглуулгыг нацистын өндөр албан тушаалтан Херманн Геринг дээрэмдсэн түүхтэй.
Энэ хэрэг нь Сейффардтын нэрээ нууцалсан нэгэн хамаатан гэр бүлийнхээ бараан нууцыг олж мэдсэнээр ил болсон байна. Хендрик Сейффардт нь нацистуудтай хамтран ажиллагч хамгийн өндөр албан тушаалтнуудын нэг байсан бөгөөд 1943 онд эсэргүүцлийн хөдөлгөөнийхөнд алагдсаны дараа Адольф Гитлер оршуулганд нь цэцэг илгээж байжээ.
Нэрээ нууцалсан хамаатан нь Сейффардтын ач охины гэрийн хонгилд дээрэмдүүлсэн зураг өлгөөтэй байхыг хараад мөрдөгч Артур Брандтай холбогдсон байна. Ач охин нь анх уг зургийг еврейчүүдээс дээрэмдсэн, зарах боломжгүй бүтээл гэдгийг мэдэж байсан ч сүүлд хэвлэлд өгсөн ярилцлагадаа ээжээсээ өвлөж авсан хэмээн мэдээлжээ.
Мөрдөгч Артур Бранд мэдээллийн дагуу шалгалт хийж, зургийн ар талд Гудстиккерийн шошго, жаазан дээр нь "92" гэсэн тоо сийлээстэй байгааг тогтоосон байна. Тэрээр 1940 онд дээрэмдүүлсэн цуглуулгын зарим хэсгийг зарсан дуудлага худалдааны архивыг шалгаж, 92 дугаартай бүтээл нь Келдерийн "Залуу охины хөрөг" болохыг баталгаажуулжээ. Сейффардт уг зургийг дуудлага худалдаанаас биечлэн худалдаж авсан бөгөөд түүнээс хойш гэр бүлд нь үе дамжин хадгалагдсан гэж мөрдөгч дүгнэсэн байна.
Одоогийн байдлаар Гудстиккерийн өв залгамжлагчдын хуульчид бүтээлийг яаралтай буцааж өгөхийг шаардаж байгаа ч хууль эрх зүйн хэд хэдэн саад тулгарч байна.
Хөөн хэлэлцэх хугацаа дууссан тул Нидерландын цагдаа нар зургийг хураан авах эрхгүй бөгөөд нацистуудын дээрэмдсэн урлагийн бүтээлийн асуудал хариуцсан хорооноос хувь хүмүүсийг албадах боломжгүй ажээ. Тиймээс мэдээлэл өгсөн хамаатан нь олон нийтийн шахалтаар зургийг жинхэнэ эздэд нь буцааж өгүүлэхийн тулд түүхийг ил болгохоор шийдсэн байна.
Энэ үйл явдал нь 2025 онд Аргентинд нацистын өндөр албан тушаалтны үр удмын гэрээс Гудстиккерийн цуглуулгын өөр нэг зураг олдсон тохиолдолтой ижил төстэй байгааг мэргэжилтнүүд онцолж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.