Норвегийн зургаан настай хүү 1300 жилийн настай эртний сэлэм олжээ
Норвегийн Иннландет бүс нутгийн Гран хотын Брандбу хэмээх газарт зургаан настай сурагч хүү 1300 орчим жилийн өмнөх буюу Викингүүдийн эрин үед хамаарах эртний ховор сэлэм олсон онцгой үйл явдал боллоо.
Фредхейм сургуулийн нэгдүгээр ангийн сурагч Хенрик Рефснес Мөртведт ангийнхантайгаа аялалаар явж байх үедээ хагалсан талбайн хөрснөөс цухуйж байсан уг түүхэн олдворыг илрүүлсэн байна.
Олдвор нь 550-аас 800 оны хооронд буюу хожуу Венделийн үеэс Викингүүдийн эрин үеийн эхэн үед хамаарах нэг талдаа иртэй сэлэм юм. Археологчид үүнийг "скрамасакс" буюу "сакс" хэмээн нэрлэдэг бөгөөд маш сайн хадгалагдан үлдсэн байна. Хожмын үеийн хоёр талдаа иртэй Викинг сэлмүүдтэй харьцуулахад уг зэвсэг нь голчлон цавчих зориулалттайгаар хийгдсэнээрээ онцлог бөгөөд наймдугаар зууны үеийн Скандинавын зэвсгийн хувьсал, дайчдын соёлыг судлахад үнэтэй хувь нэмэр оруулах юм.
Хүүг сэлэм олмогц багш нар нь түүхэн ач холбогдлыг нь шууд мэдэж, Иннландет мужийн соёлын өвийн газрын археологчидтой яаралтай холбогджээ. Мэргэжилтнүүд бяцхан хүүгийн гярхай нүдийг өндрөөр үнэлж, магтсан байна. Одоогоор уг түүхэн олдворыг Осло хот дахь Соёлын түүхийн музей рүү шилжүүлсэн бөгөөд тэнд мэргэжлийн түвшинд цэвэрлэж, сэргээн засварлах, шинжлэх ухааны нарийвчилсан судалгаа хийх ажил явагдаж байна.
Сэргээн засварлах үйл явц бүрэн дууссаны дараа эртний сэлмийг олон нийтэд нээлттэйгээр дэлгэн үзүүлэхээр төлөвлөжээ. Уг нээлт нь сүүлийн үед Норвегид бүртгэгдсэн археологийн томоохон олдворуудын нэг хэсэг болж байна. Тухайлбал, саяхан тус улсад 3150 гаруй мөнгөн зоос бүхий Викингүүдийн үеийн хамгийн том эрдэнэсийн сан, мөн 1500 жилийн настай алтан сэлмийн хуйны чимэглэл зэрэг түүхэн үнэт зүйлс ар араасаа олдоод байгаа юм.
Эх сурвалж:
• zakon.kz
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.