"Оргил цаг 4" киноны зураг авалт хойшилж магадгүй

Холливудын алдартай цуврал болох "Оргил цаг 4" уран сайхны киноны зураг авалт тодорхойгүй хугацаагаар хойшилж, ирэх есдүгээр сараас өмнө эхлэх боломжгүй болсон талаар эх сурвалжууд мэдээллээ. 

Анх хавар эсвэл зун эхлэхээр төлөвлөгдөж байсан уг төсөл саатах болсон гол шалтгаан нь гол дүрийн жүжигчид болох Жеки Чан, Крис Такер нарын цалин хөлсний маргаантай холбоотой байна.

Кино багийн зүгээс хоёр гол дүрийн жүжигчинд тус бүр 8 сая ам.долларын цалин санал болгосон боловч тэд үүнээс татгалзжээ. Энэ нь 2007 онд дэлгэцнээ гарсан "Оргил цаг 3" киноноос тэдний авч байсан 20 сая ам.долларын цалингаас эрс бага дүн юм. Одоогийн байдлаар талууд цалингийн хэмжээ болон киноны ерөнхий чиглэл дээр бүрэн тохиролцоонд хүрээгүй байгаа нь үйлдвэрлэлийн явцыг гацаанд оруулжээ.

Төслийн нийт төсөв 115-120 сая ам.доллар орчим байхаар төлөвлөгдсөн хэдий ч санхүүжилтийн асуудал бүрэн эцэслэгдээгүй байна. Түүнчлэн жүжигчидтэй заавал төлөх эсвэл тоглуулах нөхцөл бүхий "pay-or-play" гэрээг хараахан байгуулаагүй байгаа аж. Хэрэв асуудал шийдэгдвэл шинэ ангийн үйл явдал болон зураг авалт Хятад, Африк, Саудын Араб зэрэг улсуудад өрнөхөөр төлөвлөгджээ.

Уг бүтээлийн найруулагчаар өмнөх гурван ангийг амжилттай удирдсан Бретт Ратнер эргэн ирж ажиллах бол продюсероор Артур Саркиссян, Тарак Бен Аммар нар ажиллаж байна. Мөн "Paramount Pictures" компани уг киног АНУ-ын дотоодын зах зээлд 4000 гаруй кино театраар түгээхээр хэлэлцээр хийж байгааг эх сурвалжууд онцолсон юм.

Өдгөө 71 настай Жеки Чан өмнө нь Крис Такертай хамтран хөгшрөхөөсөө өмнө дөрөвдүгээр ангийн ажилд хурдан орох хүсэлтэй байгаагаа илэрхийлж байсан удаатай. Гэвч санхүүгийн болон зохион байгуулалтын томоохон саад бэрхшээлүүд тулгарсан хэвээр байгаа тул үзэгчдийн удаан хүлээсэн цувралын ирээдүй эргэлзээтэй хэвээр үлдэж байна.