Токиогийн эртний жижигхэн сүмд залуус тоглолтын тасалбар хожихыг гуйн залбирч байна
"BBC Travel" цахим хуудсанд сэтгүүлч Эрика Эбсворт-Гулдын нийтэлсэн нийтлэл олон улсын хэвлэл мэдээллийн анхаарлыг ихээхэн татаж байна.
Уг нийтлэлд Японы нийслэл Токио хотын "Фукутоку" хэмээх жижиг сүмд орчин үеийн поп соёл болон эртний шашны зан үйл хэрхэн огтлолцож, залуус дуртай хамтлаг, дуучдынхаа тоглолтын тасалбарыг олж авахын тулд залбирч буй тухай онцолжээ.
Токио хотын хөл хөдөлгөөн ихтэй Нихонбаши дүүрэгт, өндөр оффисын барилгууд болон "Coredo Muromachi" худалдааны төвийн дунд байрлах Фукутоку сүм нь 1000 гаруй жилийн түүхтэй. МЭ 865 оны үед байгуулагдсан уг Шинто шашны сүм нь эртнээс аз хийморьтой холбогдож ирсэн бөгөөд Эдогийн эрин үед (1603-1867) сугалааны тасалбар борлуулахыг албан ёсоор зөвшөөрсөн цөөн сүмүүдийн нэг байв. Түүхэн улбаатай холбоотойгоор тус сүмийн сахиус болох Уканомитамад хүмүүс аз хүсэн мөргөсөөр иржээ.
Япон улсад K-pop, J-pop болон барууны алдартай уран бүтээлчдийн тоглолтын тасалбарыг түрүүлж хандсанд нь бус, хатуу хяналттай сугалааны системээр борлуулдаг байна. Тиймээс шүтэн бишрэгчид ухаалаг гар утас, тасалбарын баталгаажуулалтын хуудсаа барин сүмд ирж, бурхнаас аз гуйх болжээ.
Тэд "эма" буюу хүслийн модон самбар дээр Аюми Хамасаки зэрэг дуртай шүтээнийхээ тоглолтод VIP суудал авах, эсвэл олон өдрийн тоглолтын тасалбар хожих зэрэг нарийвчилсан хүслээ бичиж үлдээдэг. Түүнчлэн Шин-Окубо дахь Минато Инари сүм ч мөн адил тасалбарын сугалаанд аз дагуулдаг газар хэмээн алдаршиж байна.
Сүсэгтэн олонд зориулан сүмээс тусгай сахиус, зан үйлүүдийг санал болгодог.
Тухайлбал, Эдогийн үеийн алтан зоосны дүрстэй, сугалаанд хожих зориулалттай "томикужи-мамори" хэмээх сахиусыг 500 иенээр (ойролцоогоор 4 ам.доллар) худалдаалж байна. Мөн өөр мужууд руу тоглолт үзэхээр явах шүтэн бишрэгчид аян замдаа сайн явахыг бэлгэдэж "таби мамори" сахиусыг давхар худалдан авдаг аж. Харин илүү их аз хүссэн хүмүүс 5000 иен төлж, сүмийн тахилчаар тасалбарын сугалаанд зориулсан тусгай ерөөл, адислал уншуулж болно.
Сүмийн тахилч нарын хэлж буйгаар, тасалбар хүсэж залбирах хүмүүсийн тоо сүүлийн арван жилийн хугацаанд тасралтгүй өссөн бөгөөд орон нутгийн аялал жуулчлалын байгууллагууд үүнийг орчин үеийн Японы соёлын нэгэн сонирхолтой, гэм хоргүй хувьсал хэмээн нааштайгаар хүлээн авч байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.