Марвел комиксын домогт зохиолч Жерри Конуэй таалал төгсжээ
Алдарт Марвел комиксын домогт зохиолч, "The Punisher" болон бусад олон алдартай дүрүүдийг хамтран бүтээгч Жерри Конуэй 73 насандаа таалал төгсжээ.
Түүний гэр бүлийн өмнөөс Марвел компани 2026 оны дөрөвдүгээр сарын 27-ны өдөр энэхүү харамсалтай мэдээг албан ёсоор олон нийтэд зарласан байна. Тэрээр эхнэр Лаура Конуэйн хамт амьдарч байсан бөгөөд нас барсан тодорхой шалтгааныг одоогоор мэдээлээгүй ч 2022 онд нойр булчирхайн хорт хавдартай хэмээн оношлогдож, 2023 онд уг өвчнийг амжилттай даван туулж байжээ.
Ж.Конуэй нь дөнгөж 19 насандаа Стэн Лигийн халааг авч, "The Amazing Spider-Man" цувралын зохиолчоор ажиллаж эхэлсэн түүхтэй. Тэрээр 1973 онд "Гвен Стейси нас барсан шөнө" хэмээх алдартай түүхийг бичсэн нь комиксын ертөнц дэх хөнгөн хөгжилтэй "Мөнгөн үе"-ийг эцэслэж, илүү бараан, нухацтай "Хүрэл үе"-ийг эхлүүлсэн чухал үйл явдал болсон юм.
Түүнчлэн зураач Жон Ромита болон Росс Эндрю нартай хамтран "The Punisher" буюу Фрэнк Кастлын дүрийг бүтээснээс гадна Мисс Марвел, хүн чоно, Жаккал зэрэг Марвелын олон алдартай баатруудыг амилуулсан гавьяатай. Тэрээр 1976 оны эхээр Марвел компанийн ерөнхий редактороор богино хугацаанд ажиллаж байв.
Түүний уран бүтээлийн замнал зөвхөн Марвелаар хязгаарлагдахгүй бөгөөд 16 насандаа анхны аймшгийн түүхээ DC комикст худалдсанаар салбартаа хөл тавьж байжээ. DC комикст ажиллах хугацаандаа тэрээр Жейсон Тодд, Файрсторм, Пауэр Гёрл, Киллер Крок, Виксен зэрэг олон танигдсан дүрүүдийг хамтран бүтээлцсэн байна. Мөн 1976 онд хоёр өрсөлдөгч компанийн баатруудыг нэгтгэсэн орчин үеийн анхны томоохон кроссовер болох "Супермэн Гайхамшигт Хүн-аалзны эсрэг" цувралыг бичсэн нь комиксын түүхэнд шинэ хуудас нээсэн үйл явдал болжээ.
Түүнийг таалал төгссөнтэй холбогдуулан Марвел компаниас гаргасан мэдэгдэлдээ Ж.Конуэйг "поп соёлыг бүрдүүлсэн комиксын агуу бэлгэ тэмдэг, эрхэм найз, түнш, багш" хэмээн тодорхойлсон байна. Марвелын ерөнхийлөгч Дан Бакли түүнийг түүх өгүүлэх ёс суртахуун, сэтгэл хөдлөлийн цөмийг гүнзгий мэдэрдэг авьяаслаг зохиолч байсныг онцолжээ. Харин Марвел студийн ерөнхийлөгч Кевин Файги түүний бичсэн зохиолууд өнөөгийн Марвелын кино ертөнцөд, тэр дундаа Хүн-аалз, Зоригт эр, Хүн чоно зэрэг дэлгэцийн бүтээлүүдэд асар их нөлөө үзүүлсээр байгааг цохон тэмдэглэсэн юм.
Жерри Конуэйн уран сэтгэмж, зохиолчийн ур чадвар нь хагас зуун жилийн турш сая сая уншигчдын сэтгэлийг хөдөлгөж, орчин үеийн супер баатрын төрөл зүйлийг үндсээр нь өөрчилсөн билээ. Түүний бүтээсэн дүрүүд болон бичсэн түүхүүд цаашид ч комикс болон кино урлагийн салбарт үнэ цэнээ хадгалж, хойч үеийн уран бүтээлчдэд урам зориг өгөх мөнхийн өв болон үлдэх нь дамжиггүй юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.