Майкл Жексоны намтарчилсан кино, кино шүүмжлэгчдэд гологдсон ч ашиг орлогоор тэргүүлж байна
Алдарт дуучин Майкл Жексоны амьдралаас сэдэвлэн бүтээсэн "Майкл" намтарчилсан уран сайхны кино, кино шүүмжлэгчдээс маш муу үнэлгээ авсан хэдий ч дэлхий даяар 217.4 сая ам.долларын ашиг олж, хөгжмийн намтарчилсан киноны түүхэнд дээд амжилт тогтоолоо. Найруулагч Антуан Фукуагийн бүтээл нь нээлтээ хийсэн даруйдаа үзэгчдийн талархлыг хүлээж, "Bohemian Rhapsody", "Oppenheimer" зэрэг өмнөх дээд амжилтыг эзэмшигчдийг ардаа орхиод байна.
Кино шүүмжлэгчид уг бүтээлд туйлын сэтгэл дундуур байгаагаа илэрхийлсээр байна.
"BBC Culture"-ийн нийтлэлч Николас Барбер кинонд таван одноос ердөө ганц од өгч, "2026 оны хамгийн муу кинонуудын нэг" хэмээн тодорхойлжээ. Тэрээр уг бүтээлийг өдрийн цагаар гардаг телевизийн хямд кинотой зүйрлэсэн байна. "Rotten Tomatoes" цахим хуудсанд мэргэжилтнүүд 35-38 хувийн үнэлгээ өгч, Жексоны гэр бүлийнхний хяналт дор хийгдсэн "сүнсгүй мөнгө олох хэрэгсэл" гэж шүүмжилжээ. Ялангуяа, киноны үйл явдал 1988 онд буюу "Bad" аялан тоглолтын дараа өндөрлөж, дуучны амьдралын сүүлийн жилүүд дэх хүүхдийн хүчирхийллийн дуулиан, хуулийн маргааныг зориуд орхигдуулсан нь шүүмжлэгчдийн дургүйцлийг ихээхэн хүргэсэн байна.
Шүүмжлэгчдийн хатуу үгсийг үл харгалзан жүжигчдийн ур чадвар, ялангуяа гол дүрийн сонголт олны анхаарлыг татаж байна. Попын хааны дүрийг түүний үеэл Жаафар Жексон бүтээсэн бөгөөд түүний бүжгийн хөдөлгөөн, дуурайх чадварыг онцгой сайн болсон гэж үзэж байгаа юм. Мөн Жо Жексоны дүрд Колман Доминго, Кэтрин Жексоны дүрд Ниа Лонг, өмгөөлөгч Жон Бранкагийн дүрд Майлз Теллер нар тогложээ. Жон Логаны зохиолоор бүтсэн уг кино дөрөвдүгээр сарын 10-нд Берлин хотноо анхны нээлтээ хийж, улмаар АНУ-ын "IMAX" театруудаар гарч эхэлсэн байна.
Мэргэжлийн шүүмжлэгчид болон энгийн үзэгчдийн үнэлгээний хооронд асар том зөрүү үүссэн нь энэхүү бүтээлийн бас нэгэн онцлог болж байна.
Үзэгчид "Rotten Tomatoes" дээр 4.8/5 буюу маш өндөр үнэлгээ өгч, "CinemaScore"-оос "A-" үнэлгээ авчээ. Энэхүү эерэг хүлээж авалт нь орлогын үзүүлэлтэд шууд нөлөөлж, зөвхөн Хойд Америкийн зах зээлээс эхний долоо хоногтоо 97 сая ам.доллар цуглуулж чадсан байна.
Киноны төгсгөлд "Түүх үргэлжилнэ" гэсэн бичиг гардаг бөгөөд асар их ашиг орлого олсонтой холбогдуулан "Lionsgate" компани үргэлжлэл ангийг хийхээр төлөвлөж эхэлснээ албан ёсоор баталлаа. Дараагийн ангид Майкл Жексоны амьдралын сүүлийн жилүүд, тэр дундаа олон нийтийн дунд маргаан дагуулсан ээдрээтэй үйл явдлуудыг хөндөж магадгүй хэмээн кино урлаг сонирхогчид таамаглаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.