Унгарын шинэ Ерөнхий сайд "Украин хохирогч, Орос түрэмгийлэгч" гэв
Унгар улсад болсон парламентын сонгуульд сөрөг хүчний "Тиса" намын дарга Петер Мажар үнэмлэхүй ялалт байгуулж, 16 жил засгийн эрхийг барьсан Виктор Орбаныг буулган авсан билээ.
Тэрээр 2026 оны дөрөвдүгээр сарын 13-нд хийсэн анхны хэвлэлийн хурлынхаа үеэр улс орныхоо гадаад бодлогод томоохон өөрчлөлт хийж, 27 улсыг эгнээндээ нэгтгэсэн Европын Холбоо болон 32 гишүүнтэй НАТО-гийн цэргийн эвсэлтэй хамтын ажиллагаагаа өргөжүүлэхээ албан ёсоор мэдэгдэв.
Шинээр сонгогдсон Ерөнхий сайд өмнөх удирдагчаас эрс ялгаатай байр суурьтай байгаагаа илэрхийлж, ОХУ-ын Ерөнхийлөгч Владимир Путинтэй харилцах харилцааны талаар тодорхой тайлбар өглөө.
Тэрээр Путин рүү түрүүлж залгахгүй ч хэрэв холбогдвол дөрвөн жил үргэлжилсэн дайныг зогсоохыг шаардах болно гэдгээ онцолсон юм. Мөн Украин улсыг энэхүү мөргөлдөөний хохирогч, харин Оросыг түрэмгийлэгч хэмээн шууд нэрлэж, энхийн хэлэлцээрийн нөхцөлийг зөвхөн Киев өөрөө тодорхойлох ёстой бөгөөд газар нутгаасаа татгалзахыг хэн ч шаардах эрхгүйг санууллаа.
Хэдийгээр Украины тусгаар тогтнолыг тууштай дэмжиж байгаа ч тус улсыг Европын Холбоонд яаравчлан элсүүлэх асуудалд болгоомжтой хандаж байна. Дайнтай байгаа улсыг холбоонд шууд элсүүлэх нь утгагүй хэрэг гэж тэрээр үзэж байгаа ч ирэх тавдугаар сард тангараг өргөснийхөө дараа Украинд олгох 90 тэрбум еврогийн тусламжид тавьсан Унгарын хоригийг цуцлах хүлээлттэй байна. Энэхүү санхүүжилтийг өмнөх Ерөнхий сайд Виктор Орбан өнгөрсөн арванхоёрдугаар сард зөвшөөрсөн хэдий ч сүүлд нь буцаан хориг тавиад байсан юм.
Унгар улс Оросын эрчим хүчнээс ихээхэн хамааралтай байдгийг Петер Мажар хүлээн зөвшөөрч, цаашид Москватай прагматик харилцааг эрхэмлэнэ гэдгээ илэрхийлэв. Шинэ засгийн газар эрчим хүчний эх үүсвэрээ төрөлжүүлэх бодлого баримтлах бөгөөд Оростой байгуулсан бүх гэрээг эргэн харж, шаардлагатай бол цуцлах хүртэл арга хэмжээ авахаар төлөвлөжээ. Түүнчлэн ОХУ-ыг Европын аюулгүй байдалд эрсдэл учруулагч гэж үзэж байгаа ч дайн дууссан тохиолдолд хориг арга хэмжээг нэн даруй цуцлах хүсэлтэй байгаагаа нуусангүй.
Петер Мажарын ялалт болон түүний дэвшүүлж буй шинэ бодлого нь Европын Холбооны гишүүн орнуудын дунд нааштай хүлээлт үүсгээд байна. Виктор Орбаны засаглал төгсгөл болсноор Европын Холбооны шийдвэр гаргах үйл явц дахь гацаа арилж, Москвагийн эсрэг илүү нэгдмэл, хүчтэй байр суурьтайгаар зогсох боломж бүрдлээ хэмээн барууны удирдагчид дүгнэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.