Ардчилсан намын Үндэсний бодлогын хорооны ээлжит бус хуралдаан өчигдөр хуралдаж, 2024 оны УИХ-ын сонгуульд оролцох нэр дэвшигчдээ тодруулсан билээ. Гэвч АН-ын эмэгтэйчүүд ууртай байна.

ҮБХ-ны гишүүн биш хүмүүсийг намын дүрмээ зөрчиж квот өгсөн гэж олон хүн буруутгаж байгаа бол эмэгтэйчүүд ихээхэн ууртай байна.

Тодруулбал, АН-ын Стратеги, бодлогын судалгааны хүрээлэнгийн захирал, УИХ-ын гишүүн асан З.Нарантуяа намын жагсаалтад орох хүсэлтээ намын удирдлагадаа тавьсан ч түүнийг УИХ-ын сонгуулийн 2-р тойрог буюу Говь-Алтай, Завхан, Ховд, Увсын тойрогт нэр дэвшүүлэхээр болсонд өөрөө эрс эсэргүүцсэн. Энэхүү мэдээллийг сонссон тэрээр индер лүү дайрч, хамгаалалтын залуус өргөж гаргасан билээ. Тэрээр хэвлэлийнхэнд өгсөн мэдээлэлдээ “АН хурлаа ч хийж чадахаа больсон байна. АН биш болсон байна. Би намаас гарч байгаагаа мэдэгдэе” хэмээсэн.

Харин Ц.Уянга Хан-Уул дүүрэгт нэр дэвших хүсэлтэй байсан ч түүнийг Сонгинохайрхан дүүрэгт нэрийг дэвшүүлсэнд мөн л санал нийлэхгүй байгаа ажээ. Тэрээр “Миний гурван сар ажилласан Хан-Уулын тойргийг Лодойсамбууд аваад өгчихлөө. Мөнгөө авъя! Угаасаа ҮБХ-ны нөхөн сонгуульгүй, хуульд заасан ирцийн бүрдэлгүй хурлаар тогтоосон тогтоол чинь хүчингүй. Бид нар ямар тоглоом уу” гэсэн байв.

УИХ-ын гишүүн асан Г.Уянга “Гантөмөрийн Уянга миний бие Ардчилсан Намын гишүүнчлэлээс татгалзаж, намаас гарч байгаагаа үүгээр мэдэгдэж байна. Сонгуулийн тухай хуулийн 30-р зүйлийн 30.3 дахь заалт /нам эвсэл нэр дэвшүүлэхдээ намын гишүүн, дэмжигчээсээ мөнгөн болон мөнгөн бус хөрөнгө, үйлчилгээ, барьцаа, дэнчин авахыг хориглоно/ -ыг зөрчиж авсан 10 сая төгрөгийн хандив, ҮБХ-ны гишүүн биш байтал ҮБХ-ны гишүүний татвар хэмээн авсан 6 сая төгрөг, нийт 16 сая төгрөгийг буцан олгоно уу” гэжээ.

АН шинээр ҮБХ-ны гишүүнээр элсүүлэхэд 10 сая төгрөг, жилийн татвар зургаан сая, нийт 16 сая төгрөгийн хураамж авсан байна.

Сэтгүүлч Н.Өнөрцэцэг хоёр хоногийн өмнө АН-д элссэн. Түүнийг АН-аас нэр дэвших нь нэгэнт тодорхой болсон хэмээн үзэж байсан ч талаар болов.

Тэрээр “Өнөрцэцэгийг битгий дэвшүүл гэж МАН-ын тэр дарга хэллээ гээд АН-ын лидер нь сонгон шалгаруулах хороон дээрээ хэлээд хасуулжээ. Олон гэрчтэй юм болохоор хэн тэгж үг дамжуулсан нь удахгүй гараад ирнэ. Та нар улс төрөө бод л доо, сөрж яах юм бэ гээд. Би нэг тойргийг орвонгоор нь өөрчлөх гээд байж л дээ. АН Төвийн бүс дээр намайг явуулахаар тогтсон байжээ. Төв, Дархан, Сэлэнгэ гээд ув улаан тойрог” гэжээ.

---