Ахмадууд тэтгэвэрт гарсныхаа дараа санхүүгээ хэрхэн зохицуулж, зөв зохистой зарцуулах талаар бодож эхэлдэг. Харин Америкийн Баруун Виржиниагийн их сургуулийн профессор Дана Кинг 60-аас дээш насны буюу тэтгэврийн насны ахмадууд эрүүл мэнддээ анхаарах чухал үе гэжээ. Америкт ихэнх ахмадууд урт удаан хөдөлмөрөөсөө чөлөө авч амрахдаа илүү эрүүл амьдралын хэв маягт шилжиж эхэлдэг байна. Хэрэв та болон таны эргэн тойронд тэтгэвэрт гарсан хэн нэгэн байгаа бол эрдэмтдийн санал болгосон эрүүл амьдрах 10 дүрмийг зөвлөж байна.

Хөлд эвтэйхэн пүүз таны хамгийн дотны анд байх болно

1.    Юуны түрүүнд та урт хугацааны амралтаа авсан даруйдаа хөлдөө эвтэйхэн, алхахад тохиромжтой хөнгөн пүүз худалдаж аваарай. Хөлийг тань өвтгөхгүй, шинэхэн пүүзээ өмсөөд долоо хоногт дор хаяж гурван удаа 30 минут алхаж байхыг зөвлөж байна. Долоо хоног бүр алхах зай, хугацаагаа 10 хувиар нэмээд байвал эрүүл мэндэд нэн тустай.

 

 

2.    Тэнцвэрийн дасгал хийж байгаарай. Мэдрэмж, бие махбодоо эрүүл чийрэг чигээр нь хадгалахын тулд багадаа 30 секундын турш нүдээ аньж нэг хөл дээрээ тогтож сураарай.

3.    Өглөөний цайндаа илүү их анхаарах хэрэгтэй. Нэн түрүүнд тансаг үнэртэй кофе, чихэрлэг амттанаас татгалзахыг зөвлөж байна. Оронд нь гэртээ хийсэн гадил, шинэхэн жимс, алмонд самрын сүү зэргээр амталсан смүүтийг  хэрэглэж дадах нь зүйтэй. Бүх төрлийн хоол ундаасаа чихрийг хасахыг зөвлөжээ.

4.    Аливаад уужуу ухаалгаар хандах. Өөрөөр хэлбэл стрессээ тайлах аргаа дахин боловсруулж согтууруулах ундаа, тамхи, хоол хүнсээр сэтгэл санаагаа тайвшруулж болохгүй. Гар утаснаасаа бясалгалын ая татаж 10 минут сонсоод үзээрэй.

 

 

5.    Нас явсан ч биеэ өтлүүлж болохгүй. Тэр дундаа булчингийн массаа алдалгүй хадгалж үлдэхийн тулд байнгын дадал эзэмших хэрэгтэй.

Хүн амьдралынхаа туршид суралцсаар байдаг нь эрүүл мэндэд нэн тустай

6.    Шалтай аль болох ойр харьцаж дадаарай. Өдөр бүр биш байлаа ч тогтмол шалан дээр сууж, эргээд босох дасгалыг хийж занш. Үгүй бол та дахин хэзээ ч үүнийг хийж чадахааргүй болтлоо өтөлж мэднэ.

7.    Хурдыг мартаж болохгүй. 60 хэдий нь хүрсэн хүмүүс дасгал хөдөлгөөн хийхдээ хурдтай эсвэл эрч хүчтэй хийж чадна гэхээсээ эргэлздэг. Гэхдээ санаа зоволтгүй та бүгдийг чадна. Зөвхөн хүчтэй байхаас гадна хурд эрүүл мэндэд чухал гэдгийг ихэнх хүмүүс мэддэггүй байна.

 

 

8.    Өөртөө итгэ. Өөртөө эргэлзсэнээр сэтгэл санаагаар унаж эхэлдэг. Өөртөө итгэснээр бусдыг ч бас итгүүлж чадна шүү дээ.

9.    Ямар нэгэн төсөл, төлөвлөгөө барьж ав. Амьдралдаа огт ном бичнэ гэж төсөөлж байгаагүй хүн хэдий нь гурав дахь номоо бичиж амжилт гаргасан жишээг танд сануулья. Аливаа ажлыг эхлүүлж чадвал ард нь гарах чухал.

10. Өөрийгөө хөгжүүлэхээ зогсоож болохгүй. Хүн амьдралынхаа туршид суралцсаар байдаг гэсэн үг бий. Эрүүл амьдрахын тулд тогтмол суралцаж, өөрийгөө хөгжүүлж байх шаардлагатай болдог. Энэ нь биеийн эрүүл мэндээс гадна сэтгэхүйн эрүүл мэндэд ач тустай юм.

 

Эх сурвалж: www.cnn.com

---