Сугалаагаар 167 сая доллар хожсон эр тав дахь удаагаа цагдаад баривчлагджээ

АНУ-ын Кентакки муж улсын түүхэн дэх хамгийн өндөр буюу 167.3 сая ам.долларын сугалааны хонжвор хожсон Жэймс Фартинг гэгч эр хууль сахиулагчдад тав дахь удаагаа баривчлагджээ. Жоржтаун хотын 51 настай эр худалдааны төвийн гадаа зогсоолд асаалттай байсан автомашиндаа согтуу унтаж байхад нь цагдаа нар саатуулсан байна.

Хэрэг явдал 2026 оны есдүгээр сарын 20-ны өглөө болсон бөгөөд цагдаагийн алба хаагчид дэлгүүрийн гаднах зогсоолд асаалттай тээврийн хэрэгслийн зорчигчийн суудалд ганцаараа унтаж байсан Жэймс Фартинг дээр очжээ. Түүнийг сэрээхийн тулд машины цонхыг хэд хэдэн удаа тогших шаардлага гарсан ба сэжигтнээс согтууруулах ундаа болон марихуан үнэртэж байсныг шалгалтаар тогтоосон байна. Тэрбээр уг газар өөр эмэгтэй жолоодож ирсэн хэмээн мэдүүлсэн боловч хяналтын камерын бичлэгт цагдаа нар ирэхээс өмнө машинаас хэн ч гараагүй нь ил болсон тул түүнийг Скотт тойргийн хорих төвд шилжүүлжээ.

Жэймс Фартинг 2025 оны дөрөвдүгээр сарын сүүлээр 167.3 сая ам.долларын сугалааны тохирол тааж, Кентакки мужийн түүхэн дэх хамгийн том хонжворын эзэн болж байсан хүн юм. Сугалаанд хожихоосоо өмнө хулгай болон хар тамхины наймааны хэргээр ял эдэлж байсан тэрбээр 2024 онд тэнсэн суллагдаад байсан түүхтэй юм.

Гэвч их хэмжээний мөнгө хожсон явдал түүний хууль зөрчих үйлдлийг зогсоож чадаагүй бөгөөд хонжвороо авснаас хойш ердөө дөрөв хоногийн дараа анхны баривчилгаанд оржээ. Тухайн үед буюу 2025 оны хавар Флорида муж улсын Сент-Пит-Бич хотын зочид буудалд зочинтой маргалдаж зодсон төдийгүй дуудлагаар ирсэн шерифийн орлогч руу халдсан хэрэгт татагдсан байна. Үүнээс хойш тэрбээр гэр бүлийн хүчирхийлэл үйлдэх, орон байрны хулгай хийх, осол гаргаад хэргийн газрыг орхин зугтах, тэнсэн харгалзах хугацааны дэглэм зөрчсөн шалтгаанаар нийт дөрвөн удаа цагдаад баригдаж байжээ.

Ийнхүү сугалаанаас урьд хожид байгаагүй их мөнгө хожсон тэрээр өмнөх тэнсэнгээр суллагдсан болон шинээр үйлдсэн зөрчлүүдээс шалтгаалан хуулийн хатуу хариуцлага хүлээж таарах нөхцөл байдал үүсээд байна.

Эх сурвалж:

• news.ru

• osnmedia.ru

• life.ru