Өмнөд Солонгост очвол залуусаас бус ахмадуудаас болгоомжлоорой!

Монголчуудын хамгийн их очдог Өмнөд Солонгос улсад ойрын таван жилийн дотор гэмт хэргийн гаралт огцом ихэсчээ. Хачирхалтай нь залуучууд бус ахмадууд гэмт хэрэг ихээр үйлдэх болжээ.

Албан ёсны статистик мэдээллээр 65 болон түүнээс дээш насныхан гэмт хэрэг үйлдэх нь ойрын таван жилд тус улсад 45 хувиар өссөн байна. Түүнчлэн 2013 онд хүн амины гэмт хэрэг, хүчин, орон байрны хулгай дээрэм 1,000 орчим бүртгэгдсэн бол 2017 онд энэ тоо 70 хувиар өсч 1,800 болжээ.

Жишээ дурдвал өнгөрсөн 11 дүгээр сард 70 настай эрэгтэй авах ёстой илгээмжийг нь удаасан ажилтан руу дайрч доромжилсноосоо болж баривчлагдсан байна.  Цагдаа нар хэргийг шалгахад өндөр настан хоёр хоногийн өмнө илгээмжээ хүлээж авснаа мартчихсан байсан гэнэ. Наймдугаар сард өөр нэг 70 настан хоёр үйлчлэгчийг хороож, хөршөө гэмтээсэн хэрэг гарчээ.

НҮБ-ын мэдээллээр Өмнөд Солонгосын хүн амын 14 хувь нь 65-аас дээш насныхан байгаа юм. Энэ насны хүмүүсийн ихэнх нь хөдөлмөр эрхлэх чадвараа алдаж, санхүүгийн бэрхшээлтэй тулгардаг нь тэднийг уур уцаартай авир гаргахад нөлөөлдөг гэж үзжээ. Тиймээс нийгэм, соёлын ялгаанаас болж хохирол амсаж буй 65-аас дээш насныхныг эргэн нийгэмшүүлэх, улсаас харж хандах арга хэмжээ авах хэрэгтэй гэж эх сурвалжид дурдсан байна.

Эх сурвалж: www.cnn.com